Ruben Everaldo Croes, broeder, ingeniero, piloto, capitan di barco (grootvaarbewijs), co-fundado di SARFA, co-fundado di Edmund Harms Foundation, docente cualifica (Pedagogisch Getuigschrift), autor di buki, musico, manager di dos banda musical, imker den su tempo liber, tata di dos yiu y padushi di tres nieto; su pret’i wowonan.
Corona riba su meritonan ta su condecoracion como Ridder in de Orde van Oranje Nassau, otorga na dje na 2012 pa SM Reina Beatrix pa su trabounan sobrehumano na Haiti despues di e temblor na 2010 y e forma con el a pone Aruba riba mapa di mundo cu su idea, su invencion y su pasion cu pa semper lo keda riba su nomber y di Anthony Blok como e unico dos fundadonan di Aruba Hi-Winds Pro-Am. Na hopi ocasion Ruben a hera perde su bida salbando bida di otro. Su buki “Sobrebibi” ta trata un di e odiseanan aki durante horcan “Lenny” na 1999. Pa mas cu 30 aña Ruben cu su ruman muhe Yolanda, a canta na entiero, den misa y na santana pa brinda e sernan keri un poco consuelo, sin nunca a cobra un cen preto. Pa Ruben material no ta loke ta mas importante.
Diahuebs tabata Ruben su ultimo dia di trabou, despues di 46 aña trahando den enfermeria. Su prome dos añanan cu el a traha na San Pedro di Verona cerca e soeurnan, e tabata hopi jong pa por a wordo tuma oficialmente den servicio y p’esey e añanan aki no ta wordo conta den su total añanan di servicio. Oficialmente nan ta 44 aña, loke ta un berdadero hazaña cu poco ta logra.
Pa e dia aki no pasa bay sin mas, doño di e Deli den Hospital, Amber Daryanani, a organisa algo bunita pa Ruben: el a decora su luga, prepara snacks, traha un bunita collage di Ruben su bida en corto y bisa tur hende pa pasa desea nan amigo Ruben tur felicidad den e etapa nobo aki di su bida. Ruben a bin cu su guitara y den un rato ambiente a forma. Soeur Figaroa dfm a yega di bisa den un entrevista: “Si tabatin 100 Ruben riba e mundo aki, mundo lo tabata un miho luga.”
