Un tema cu ta basta den discusion e ultimo temponan aki, ta e tema di indexering pa e empleadonan publico.
Diahuebs OPPA a trece su punto dilanti ora cu el a señala cu e bloke sindical ta na soño, relaciona cu indexering.
Rodney Solognier, di SPA a indica cu e ta haya jammer cu Valdes a bisa esaki. Sindicato SPA a manda un carta pa Prome Minister, mr. Evelyn Wever-Croes, riba cual nan a haya un contesta caba.
Solognier a sigui bisa cu den e carta e mandatario ta bisa hopi, pero na final toch no a bisa nada. No a haya un fecha pa sinta hunto cu Gobierno, cual ta loke nan kier. A bira tempo pa cuminsa sinta na mesa tocante esaki, pasobra cu indexering tin hopi tempo para. Den e simannan padilanti, SPA lo traha riba un contesta pa manda bek pa Prome minister.
Den e ultimo añanan, cu indexering tin para, tur cos a subi. A yega ora, en bista cu Gobierno mes a bisa cu nan tin un surplus, cu nan tin placa pa paga Hulanda, mester por tin placa pa paga indexering tambe.
GEVARENPREMIE
Den pasado tambe e tema di ‘Gevarenpremie’ a bin dilanti, tempo cu mr. Andin Bikker tabata Minister di Husticia.
Solognier, Presidente di SPA, a indica cu e tempo ey Gobierno a informa nan cu pa e polisnan haya esaki, e ora lo mester duna henter e cadena hudicial, cu ta e departamento mas grandi di Gobierno.
El a sigui bisa cu e no ta bringa pa tur e cadena hudicial, ta bringa pa e polisnan. Mester tin un ‘Gevarenpremie’, cu nan por tin un seguro pa nan famia.
Si algo pasa, ta algun luna e polisnan ta haya, despues nada mas. Polis merece un tiki mas ya cu cada biaha cu nan sali, nan bida ta na peliger constante, den ehercicio di nan trabou.
Como polis, nan merece un poco mas pa nan siguridad. Nan ta wordo exponi na tur sorto di peliger, unda c’un hende por haci nan daño. “Tur hende conoce polis, pero polis no conoce tur hende.”
Proximamente nan lo acerca e directiva, den un otro ‘bachi’. Cu e polisnan mester di dje, esey ta sigur.
Ademas, di polis, nan ta tambe ‘Opsporingsambtenaar’. Esaki ta haci cu nan ta cay completamente bou di un otro tarifa.
