October a cera cu un tremendo Rocktober Fest, caminda e comunidad di Rock a sa di reuni y disfruta di un anochi tremendo cu cuater banda na Backyard by Patio 15. Ta trata aki di Rejected, Active Mirror, After Dark y Missing Link cu sigur a causa un impresion grandisimo cerca e publico presente tocando tur e hitnan di momento y sin duda esunnan cu ya ta conoci caba.
Fuera di esey tabatin un professional pole-dancer, cu sigur a haci un tremendo trabao, y hasta nos ta tribi di bisa cu a ‘motiva’ un miembro di publico pa purba e ‘pole’. Sin duda un ‘Dora la Exploradora’, a sa di maneha e ‘pole’ hopi bon mes y a sa di ricibi su aplauso mereci.
Tambe tabatin show di candela tanto paden y pafo, caminda cu e profesionalnan den esaki a sa di crea un ambiente expectacular cerca e publico.
Durante e show tambe tabatin rifamento di varios doorprize cu premio atractivo p’e publico. Tambe tur esunnan cu a bin p’e show a pasa n’e photobooth y tene un photosession, haciendo e anochi aki uno inolvidabel. Por a mira tur clase di disfraz p’e anochi aki, anticipando Halloween, cual ta awe, dia 31 di october.
Den un solo palabra, Rock ta mas bibo cu nunca na Aruba y no lo descarta cu proximamente lo nos scucha mas di e diferente actividadnan p’e comunidad aki, cu ta creciendo. Tambe tin di remarca cu entre e publico tabatin varios hoben cu a disfruta masha hopi mes di e bandanan cu a toca. Un palabra di pabien ta bay n’e promotornan Rock ‘N Rock Productions, Natalia de Windt y Rob Arismendi, cu un tremendo fest y nos ta sigui cu ya nan a bay sinta na mesa pa bin cu un proximo Rock Fest. Foto cortesia Roberto Arismendi y Rowald de Graaf.
