Siendo un ex Alto Inspector di Polis, encarga cu otro maneho di Polisnan investigativo (recherche), awe asina cu a tende di e atraco arma na Noord y cu e actuacion rapido di Polis, e miembro di Parlamento di AVP, Robert Candelaria, a opta pa pasa bishita Warda di Polis pa personalmente e felicita e Polisnan cu nan trabou. Claro e ta consciente cu ta diferente departamento di Polis ta envolvi ma momento di un accion asina, pero e kier pa nan tur sa cu e ta hopi orguyoso di nan. “Mi no por gaña, ora mi tende cosnan asina pasa, mi ta sinti manera un responsabilidad pa mi subi caya mesora. Casa bes mi mester corda mi mes cu mi no ta Polis mas, sino Parlamentario. Pero mi kier pa mi ex coleganan sa cu mi ta biba cada un di e momentonan ey cu nan, tanto esunnan bon como esunnan menos bon”, asina e Parlamentario a bisa e Polisnan uniforma y recherchenan trahando na Warda di Polis na Shaba.
“Claro cu mi ta consciente cu no tin espacio pa politica den trabou di husticia. Pero un schouderklop pa Polisnan cu ta sali tur dia for di nan cas, laga nan famia tras, pa risca nan bida pa nos, nunca no ta di mas”.
E Polisnan a aprecia e bishita masha, compaña pa e palabranan di sosten y motivacion. E Parlamentario no a bay den detaye di e caso mes, pasobra esey ta competencia di Ministerio Publico. Su intencion mas bien ta pa mustra un sosten na e Polisnan cu den un rato di ora, dor di patruya di forma strategico y coordina, a topa cu e auto sospechoso y a logra gara e posibel sospechosonan envolvi den un atraco cu a caba di tuma luga.
E comision di Husticia den Parlamento ta preocupa cu e aumento den criminalidad riba nos isla. Di un banda e tin di haber cu un aumento den cantidad di ilegalnan riba nos isla, pero tambe cu nos mesun hendenan cu lamentablemente sa tuma e caminda di mas facil pa yega na placa. Pesey a base regular e Parlamentario ta reuni cu Minister di Husticia pa aporta cu ideanan creativo pa por formula un maneho mas coherente cu miho resultado. Esey ta rekeri poco mas cu djis auto nobo pa Polisnan. E tin di haber cu leynan bon hinca den otro pa duna Polis e autoridad necesario, material moderno pa por conduci investigacionnan di forma mas profesional y eficiente, banda di suficiente Polis bon prepara pa por conduci e tipo di investigacionnan complica asina.
Di otro banda tin cu menciona tambe cu na momento cu a pidi den parlamento pa aumenta e presupuesto pa cu overtime mirando e temporada largo y duro di carnaval cu polisnan lo enfrenta e aña aki, retonan manera entre otro den Kust surveillance como tambe teniendo na cuento cu no lo bin mas polis aserca den e cuerpo, cu excepcion di un klas chikito cu menos overtime ta haci nan bida imposibel. Tur ta peticionnan importante cu no a tene cuenta cu ne den e presupuesto aki. Remarcabel ta cu no ta un pero varios polis ta duna di conose cu for di September aña pasa bin ariba nan ta trahando mas di 16 ora pa dia cual ta haci nos aprecio aun mas grandi pa nan. Polisnan ta trahando hopi mas ora , cu un cansacio ta keda traha skerpi y awe ta bolbe logra “shine” dor di mustra cu bou di e circumstancianan ey nan por a duna un hopi bon producto, Candelaria a bisa.
E miembro di Parlamento a keda masha contento di tende cu comunidad ta aportando enormemente na investigacionnan policial ultimo añanan, den cual ta yama duna tip, anonimo, pa yuda Polisnan soluciona casonan mas lihe. Cada informacion ta yuda y por kita un criminal mas for di caminda cu kisas lo a horta Bo mes despues. Ta tuma henter un comunidad pa hunto nos percura pa mas siguridad riba nos isla.
“Forsa. Aruba ta orguyoso di Boso”, asina e Parlamentario a bisa na salida di su encuentro cu e Polisnan na Warda di Polis di Noord awenochi. El a bisa cu su admiracion tur dia ta crece mas pa su ex coleganan, cu aunke tin recursonan limita, falta di inversion continuo den reclutacion y ekiponan moderno, toch ta traha oranan largo, di dia y anochi, pa gara e sospechosonan aki.
