E Wever-Croes Norm, esta Landsverordening Normering Topinkomens (LNT), tin hopi preocupacion den e sector profesional. Dialuna awo parlamento ta bay trata e ley aki, pero Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V. (VWI) ta keda riba e mesun postura di no ta di acuerdo cu e ley aki. Tanto APFA como Raad van Advies a bisa mesun cos pa loke ta e suma maximo p’un director di compania.
Richard Frank, presidente di VWI, a indica cu e miembronan ta hopi preocupa y nan posicion riba Landsverordening Normerings Topinkomens no a cambia. E sindicato no ta mira ningun balor agrega n’e ley aki y nan no ta di acuerdo cu ne. Despues di lesa tur cos den e ley, conseho di Raad van Advies, e parti cu gobierno ta contesta su ponencianan, ta bin saca afo cu eigenlijk mescos cu e carta cu APFA a saca, cual ponencia ta mustra duidelijk cu no tin un estudio profundo, un base bon pensa riba e diseño di e ley aki cu tin un impacto asina grandi. Specialmente riba e profesionalnan, no solamente esunnan di WEB Aruba NV, pero profesional rond di Aruba cu ta traha pa compania estatal of compania cu ta cay bou gobierno.
Esey ta e prome punto cu el a trece dilanti. No tin un estudio y ta manera a sac’e fo’i cashi y saca un ley, pero tirando un poco cifra riba dje. E di dos punto segun Frank, di cual APFA tambe a trece dilanti, tin algo cu no ta cuadra. E motibo cu esaki no ta cuadra, ta pasobra ley ta bisa e maximo cu e Normering Topinkomens mag di yega pa un director di compania, manera WEB of Setar, ta 261 mil florin cu ta para den e ley. Awo nan ta bisa cu esey lo mester representa e analogia di balkenendenorm cu tin na Hulanda y esey mester representa e 130% di e entrada dje prome minister. Sinembargo, APFA a mustra esey den su carta cu e calculacion di profesional, cu aparentemente tin e cifranan aki, ta bisa cu prome minister su volledige loon ora di calcula esaki ta sali rond di 410 mil florin.
Esaki di APFA ta colabora door di Raad van Advies, cu tambe ta bisa den nan stuk, caminda e actuaris cu a haci calculacion di e Corporate Governance. A haci un scan lihe (quick scan), pasobra e no ta un estudio haci. Esaki tambe ta bini cu e inkomers akinan ta cay rond di 410 mil. P’esey loke tanto APFA como Raad van Advies a trece dilanti ta colabora cu otro, pero asina mes ta pone den e ley 261 mil. Kiermen algo no ta cuadra, pasobra si tin calculacion di profesional ta bay trece algo riba papel no ta asina.
