Fraccion di AVP a tuma nota di e conferencia di prensa cu director di Refineria di Aruba, Alvin Koolman, a duna. Refineria di Aruba ta doño di e facilidadnan cu CITGO ta huur.
Segun parlamentario di AVP, Richard Arends, si wak e situacion hopi delicado cu Venezuela ta pasando aden, pero tambe e situacion geopolitico caminda cu tin sancionnan di Merca pa funcionarionan di gobierno Venezolano, e ta trece e speed den cual financiamento lo por bin for di Merca. E ta complik’e un poco mas. Esey no ta kita un biaha mas e obligacionnan di CITGO Aruba Refinery, su obligacionnan cu e lo por tin cu cualkier contratista.
E imposibilidad di paga no ta causa, no ta rason pa loke nan ta yama un force majeure. Pa e parti di Gobierno lo a spera un situacion un poco mas proactivo. Si ta wak un empresa ta representa 12 pa 15 porciento di bo economia, lo bo ta un tiki mas proactivo pa loke ta trata gobierno Mericano, tambe gobierno Venezolano, pero tambe e gobierno encarga cu Venezuela pa por yega na un situacion mas normal cu ta posibel. Nos tur ta compronde cu e situacion ta delicado, pero sinembargo, segun e parlamentario, un poder di convencimento caminda cu por convence y cu Gobierno Mericano por compronde cu e fondonan cu ta yega Aruba no ta bay pa e personanan en cuestion, e personanan cu ta bay sancion, esey lo por a agilisa e proceso un poco mas.
Mescos cu director di Refineria di Aruba a bisa, nan ta bezig. Arends ta kere den pleno confiansa di expertonan di Refineria di Aruba, cu nan ta haciendo nan trabao. Pa por haci esaki ta un momento di warda, ta un momento di hopi inclaridad tambe pa loke ta trata e situacion interno di Venezuela.
Ta un momento di warda pa wak. Sinembargo esey no ta kita e obligacionnan di e empresa pa cu pais Aruba y tambe otro contratistanan aki na Aruba.
