Ta un tradicion na Aruba cu nos ta celebra e dianan di fiesta cu sopi cabrito, pia di porco y suls tempera. Hopi persona ta cria bestia durante henter aña pa den luna di december nan por sacrifica esakinan pa consumo propio.
Servicio Veterinario ta corda tur persona cu kier sacrifica un cabrito, carne of porco pa consumo propio cu esaki mester wordo haci na Abattoir. Matamento di bestia na cas ta ilegal y por tin riesgonan pa salud di hende.
Tur persona cu kier haci uzo di servicio di Abattoir pa sacrifica un bestia durante luna di December 2018 por haci esaki for di Dialuna te cu Diahuebs, parti mainta. Ta pidi tur persona encarecidamente pa trece e animalnan entre 7:00am y 9:00am y e ultimo dia pa mata bestia lo ta Diamars 18 di December 2018.
E proceso di sacrifica animal na Abattoir ta tuma luga via cita y ta conseha tur doño cu ta desea di sacrifica un of mas animal pa come, pa yama un dia prome pa confirma cu e kier haci uzo di e servicio di Abattoir. Esaki ta pa por coordina e matansa na un manera structura y por brinda un miho servicio.
Pa mas informacion por tuma contacto cu servicio Veterinario na telefoon 5224310 of pasa personalmente na Barcadera 1.
