E mocion di desconfiansa presenta pa fraccion di MEP den Parlamento ayera nochi tabata uno sigur cu a crea un tension enorme entre e partido den oposicion y e fraccion di RED cu tambe ta forma parti di coalicion.
Ambos partido a sali for di e edificio di Parlamento ayera den forma di protesta pasobra nan no kier participa den weganan politico.
Nan ta yama e maneho aki uno ilegal, mientras tanto cu presidente di Parlamento Ady Thijsen ta hustifica cu el a cumpli cu e acuerdo firma durante di e temporada aki di pandemia.
Pa e motibo aki mes, e presidente di Parlamento a presenta na despacho di gobernador, kende a presenta na su oficina den forma urgente pa un audiencia.
Normalmente un reunion asina ta dura di 15 minuut pa mey ora, pero esaki a dura mas hopi cu normal.
Tin cu tene na cuenta cu un combersacion cu gobernador ta uno cu ta bay den full discrecion, esta cu no por divulga loke a papia.
Thijsen a splica cu gobernador ta haci su trabao. Nan tabata tin un encuentro serio. Den cuadro di su funcion como cabes di Parlamento, nan por yam’e semper, Thijsen ta splica.
El a comenta cu e di su banda, ta haci su parti y ta tuma su decision cu ta cana su caminda.