Ex minister drs. Marisol Lopez-Tromp a tene un conferencia di prensa den cual el a expresa su banda di medaya pa loke ta su retiro. Un retiro cu a tuma luga cu 10 voto na fabor den Parlamento. Despues di esey Gobierno di Aruba a manda un carta pa Gobernador, caminda cu 6 di e 7 ministernan no por traha cun’e, pa despues Gobernador manda un carta pa Parlamento pidiendo nan sentimento riba e relacion cu e Gobierno no por traha cu ne. Dia 22 di october ultimo, e minister a ricibi su retiro.
E ex mandatario a expresa den su prome reaccion despues di a haya e notificacion oficial di su retiro como minister, cu den e Landsbesluit ta para cu dia 22 di october ultimo, cu a base di desicion di prome minister y mirando cu Conseho di Minister, den e caso aki a bay di acuerdo dia 21 di october, cu retiro di Marisol Lopez-Tromp y naturalmente tambe ta menciona cu ta duna e retiro di inmediato gradiciendo pa tur e trabaonan haci pa pais Aruba.
Segun e ex mandatario, e ta para masha simpel, pero tras di e documento aki, por bisa cu tin mucho mas tras di esaki cu djis un simpel retiro, por medio supuestamente un mocion di desconfiansa, cual despues desemboca di ta un mocion ilegal di Parlamento di Aruba, cual a nifica cu ora cu a manda esaki pa Gobierno e no lo por a fungi como base di e retiro y a recuri pa bin cu un otro motibo pakico lo mester retira Lopez-Tromp, cu loke Parlamento a aproba supuestamente den e reunion di spearfishing.
Mirando e discusionnan tambe cu a surgi a base di e mocion aki, a bin hopi discusion riba su legalidad, cu su rason, segun Lopez-Tromp. No ta bay solamente pa djis un retiro di dje. E ta mucho mas cu esey, el a enfatisa.
E ta tur e ferviente intentonan desde juni ultimo pa awo recien, den un periodo di algun luna, caminda cu den un forma practicamente sistematico cada bes tabata purba pa por mand’e cas.
Segun Lopez-Tromp, a base di e mocion aki, e discusionnan cu a lanta den comunidad, e banda positivo di dje ta cu el a haci hopi di nos hendenan hopi mas consciente y cu wowonan a habri riba proceduranan hiba cu no ta corecto, cu no ta legal, cu ta trapa riba nos constitucion, cu no ta cumpli cu reglamento di ordo di Parlamento di Aruba, no ta respeta reglanan cu tin di votacion den un Parlamento di Aruba y hasta na cierto momento, por a scucha eroneamente for di boca di prome minister, como practicamente ta bagatelisa pa no worry mes cu e mocion si e ta legal si of no.
Ki mensahe ta trece cu esaki na henter comunidad y particularmente na nos futuro generacionnan cu mester sa y respeta nos leynan riba nos pais.
