Diahuebs anochi alrededor di 8:45 pm a sosode un accidente rib’e camind’i Sabana Liber pa Kudawecha. Aki ta caminda cu chauffeur di un auto marca Ford modelo Explorer, numera A-47930 p’un motibo of otro a perde control, baha caminda y bay pega contra di un mata.
E daño material tabata considerabel. Na momento cu polis a bay papia cu e chauffeur, nan a spanta. E chauffeur a sac’un baf basta fuerte di alcohol. Ta suficiente motibo p’e polisnan haci un test di alcohol cu e chauffeur.
E chauffeur tabata asina burachi cu e no por a ni supla. A dun’e tres chens, asina mes no a logra. A detene bou sospecho di stuur auto bou influencia di alcohol. Den un transporte policial a hib’e pa warda di polis caminda lo present’e dilanti un subfiscal. Mirando cu e auto no por a move riba su propio forsa, a pidi un takelwagen pa lanta e auto y bay cu ne.
