Mester simplifica Aruba su sistema fiscal completamente, pasobra no por mantene tur heffing cu tin. Si ta introduci un solo belasting, -pasobra aworaki tin diferente bestemmingsheffing, tin un BAZV cu ta bay pa AZV-, gobierno mester simplifica completamente su operacion di Departamento di Impuesto. Introduci BTW tabata e miho opcion na luga di BBO na frontera, mirando cu lo tin un solo impuesto riba tur mercancia y no solamente riba handelsgoederen.
mr. Gerlien Croes, Parlamentario Independiente, a splica cu gobierno tin un solo pot y tur hende sa cu tur a cumpli na momento di paga. E sistema mas facil den un sistema asina ta ora di aplica belasting riba producto. Tur hende ta consumi producto, tur hende ta cumpra producto afo, of ta cumpra producto localmente. Asina ey tur hende a paga su porcentahe. E comerciante como ciudadano sa tambe cu loke a paga den e prijs, unda a cumpra, cualkier servicio cu el a tuma, el a cumpli.
“Mi no mester keda keep up cada bes ‘hesu mi no a paga mi nummerplaat. Ata mi a peg’e laat y haya un na heffing di 100 pico di florin’”, el a expresa. Ora di haya un heffing y no paga, bo ta bay den bezwaar. E ora kico esey ta significa pa Departamento di Impuesto? Pa hopi aña a papia riba simplifica e sistema di belasting. E no ta un custumber, pero ta cambio cu ta significa probablemente un ‘shock’ p’e comunidad.
Croes a indica cu n’e pais aki a yega cierto caminda cu “nos tin cu durf (tribi) haci diferencia.” Tin cu tribi di haci cambio cu kisas no ta facil y mester bay den fase di transitorio. Na final di dia no solamente kier papia di compliance, tur hende ta cumpli. Pero na final di dia ta simplifica e bida di ciudadano como gobierno mes. Asina ey ta garantisa cu tur hende ta cumpli manera debe ser.
E parlamentario independiente ta kere cu tin di hiba discusion no solamente riba pueblo, pero tambe riba multi nacional Aruba. Aworaki cu varios introduccion di cambio, nan tin cu paga mas. Mester bay haci un bon analisis di cuanto belasting multi nacional ta paga na Aruba y en realidad ta beneficia e pais. Ta imposibel cu Aruba ta un pais cu ta ricibi hopi bishitante pa aña, hopi placa ta circulando, y pueblo ta biba den e forma cu e ta bibando. Croes a indica cu eigenlijk Aruba mester ta un di e islanan di mas rico n’e mundo aki.
E parlamentario a expresa cu e no ta un persona di wak pasado, di wak ki a bay robes, ki a pasa den pasado, ken a bay of ki decision no mester tabata tuma. Pero si e direccion, e forma di maneha Aruba mester cambia, esey ta e realidad. Tin cu bay para duro y no tene miedo pa motibo di ta un isla chikito, pero mester para duro pa locual e pais merece. El a enfatisa cu mester cuminsa na simplifica e sistema di belasting por completo. No solamente no tin cumplimento, pero tambe n’e momento aki a crea buraco den e sistema.
BTW
Comerciante ta haci pedido directamente afo, nan ta crea compania na Merca. Aki nan ta cumpra producto directamente for di unda ta cumpr’e cu ta cumbini nan compara cu mester bay cumpra via via y tin di paga mas na belasting. E sistema actual simplemente ta manca. No ta haciendo suficiente pa crea un cambio di berdad p’e pueblo. P’esey e parlamentario independiente ta kere cu introduccion di BTW mester crea un balansa. Si bin cu un BTW aworaki, un porcentahe mas ta bay pisa hopi. E ora mester bay kita of crea un balans cu un otro belasting. Of ta mantene e BBO manera ta, y segun e parlamentario, amplic’e riba tur mercancia y no solamente riba handelsgoederen.
