Restaurantnan uni contra maneho di Toque de Queda

8470

Restaurantnan banda di hotelnan a uni den un protesta y a paga nan luznan for di 6’or di atardi. Esaki como protesta pa e medidanan nobo tuma door di Gobierno cu ta afecta nan sector.

Nan ta bisa cu Aruba y e hendenan di Aruba a sufri mas cu cualkier otro pais na mundo debi na Covid-19. Y esaki ta algo cu no ta Aruba ta bisa pero publicacionnan internacional. 

Restaurantnan uni contra maneho di Toque de Queda: Ta cera awe 6:00pm como accion di protesta!

Posted by 24ora on Saturday, September 19, 2020

E sector aki y mayoria di esnan cu ta traha eyden ta desapunta cu Gobierno su decision pa cera establecimentonan pa 9’or di anochi. E ta un golpi fuerte pa nan.

Debi na e decision aki mayoria a dicidi di cera nan portanan pa 6’or di atardi te proximo aviso. Esaki debi cu nan gastonan di huur, utilidad, Setar y impuesto ta halto caba pa mantene nan negoshi den operacion, segun e reglanan di Gobierno. 

Si Gobierno dicidi di mantene e medidanan aki nan ta haya nan mes obliga di laga nan empleadonan bay. Sin entrada, e empleadonan aki ta bay depende di Gobierno. Nan kier pa pone e ora pa cera establecimento na por lo menos 11’or di anochi bek. 

Nan ta spera cu Gobierno honra nan peticion p’asina nan por mantene un ambiente laboral saludabel y sigur pa e trahadonan local por sigui cria nan famia, paga nan impuestonan y biba den harmonia riba e isla.