Fundacion Respaldo a celebra cu exito e di dos edicion di Let’s Sing for Mental Health, un festival musical dedica na salud mental, cu participacion di diferente grupo, incluyendo pa prome biaha miembro di Cuerpo Policial.
Directora Carolina Hart a indica cu e evento a tuma luga pa peticion di publico y e participantenan, y cu Respaldo ta considera evalua un posibel tercera edicion. Den e festival, dos participante di Cuerpo Policial a gana premio, incluyendo señora Jelitza Cruz den categoria profesional. Categoria di hoben tambe a destaca cu bon presentacion. Hart a gradici e sponsornan, team di Respaldo y specialmente e productor Johanne Jacobs pa nan dedicacion.
Hart a anuncia tambe cu Respaldo ta amplia su ekipo profesional, incluyendo un psikiatra di Colombia cu lo traha permanentemente na Aruba y un psikiatra pa mucha y hoben. E fundacion ta busca mas psicologo y otro specialista pa yuda atende e listanan di espera. Na preparacion pa su di 10 aniversario, Respaldo lo duna mas informacion na comunidad tocante su servicio, manera di trabou y e apoyo disponibel p’e personanan cu ta enfrenta dificultadnan di salud mental.
