Pa mas o menos 1:00 pm di diadomingo, autoridadnan a cancela e alarma di un posibel explosivo na San Nicolas y a habri tur caminda bek. Esaki a sosode despues cu un experto di bom a yega for di Corsou y a constata cu e obheto sospechoso tabata un cahita cu un bleki bieu aden.
E incidente a mobilisa Polis, Koninklijke Marechaussee y Marina Real, mientras e ceramento a afecta henter centro di San Nicolas durante varios ora.
No tabatin bommelding
Un aclaracion esencial ta cu no tabatin un yamada di menasa di bom. E alarma a origina despues cu un security guard di Refineria di Aruba (RdA) a descubri un obheto cu el a considera sospechoso.
Caha sospechoso
Pa mas o menos 6:00 am, ora e “watchman” a subi warda, el a topa cu e cahita poni na un baki di mata banda di e edificio. El a informa su superiornan, cu despues a informa polis.
Polis a presenta na e sitio y tambe a considera e cahita sospechoso. A activa e bomverkenners pa evalua e situacion y a cera e area como medida preventivo, mientras publico mester a keda afo di e zona bou investigacion.
A activa Corsou
E evaluacion inicial a conduci na e decision pa solicita asistencia di un specialista di bom for di Corsou. E experto a biaha bin Aruba cu avion militar pa investiga e pakete y determina si berdad e tabata representa un peliger.
Finalmente, e inspeccion a establece cu e cahita tabatin un bleki bieu aden. No tabatin ningun bom’
Joke caro
Minister di Husticia Arthur Dowers a confirma cu autoridadnan a desactiva e alarma. El a expresa su preocupacion pa e gastonan cu e operacion a trece cu ne.
“E joke aki a costa nos por lo menos un 50 mil florin na overtime, gastonan di avion militar y mas”, Dowers a declara.
E suma menciona pa e minister ta un calculo inicial di por lo menos Afl. 50.000. Ainda no tin un resumen final di tur gasto relaciona cu e accion do autoridadnan envolvi.
Revisa camara
Awor ta revisa e grabacionnan di e camaranan di siguridad pa determina ken a laga e cahita na e baki di mata. Un posibilidad cu ta considera ta cu un persona ambulante cu problema di adiccion por a lag’e atras. Sinembargo, ainda no tin confirmacion di e identidad di e persona ni di e motibo pa laga e obheto na e sitio.
E hallazgo final tambe ta cambia e cuadro di e incidente: no tin base actualmente pa conclui cu un hende a haci un menasa di bom of a laga e cahita cu e intencion di provoca un alarma falso. No tabatin nada skirbi riba e cahita tampoco!
Cu e inspeccion completa y ningun explosivo encontra, autoridadnan a duna luz berde pa habri e camindanan y permiti cu actividad den centro di San Nicolas por sigui normalmente.
Di dos pa e aña aki
Mester menciona cu e aña aki caba nos a haya nos mes confronta cu un situacion similar. Na februari 2026 a cera(Aeropuerto Reina Beatrix pa un melding di bom falso a causa un caos grandi pa varios ora. E menasa tabata den un vuelo di JetBlue cu tabata biniendo for di Boston, despues cu un pasahero a topa cu un nota bisando cu tin un bom abordo. Siguiendo e protocolnan di siguridad internacional, a evacua aeropuerto temporalmente y a obliga e vuelonan yegando pa circula den aire of desvia pa aeropuertonan den region, manera Corsou. Despues di un investigacion profundo, a resulta cu e melding tabata falso.
