Cala Romana na Budui ta un di e compania cu gobierno a para su actividadnan di coba santo y piedra. El a bay corte pa asina busca su derechonan como un compania estableci cu su permisonan na Aruba.

Rene van Opbergen ta e operations manager di e compania aki y e ta splica cu esnan cu ta perhudica di tur esaki, ta e trahadonan di e companianan, kendenan tin famia, cu tin nan obligacionnan. Henter e storia, bisa den corto, tin esnan cu ta den vecindario ta keha di un problema despues di 18 aña.

E habitantenan ta keha di stof, santo, desordo y asina por menciona, cual ta hopi straño. Tur e tempo cu van Opbergen ta na Aruba, un di e habitantenan, despues cu biento draai ta keha di stof. A yega na un acuerdo cu ora e biento bira, ta stop cu e operacionnan.

Tin algun hende for di e vecindario cu a firma un obhecion, cual ta hopi straño. For di 2000 a haya un permiso di establecimento y cu por eherce nan trabao loke nan ta haci tambe. Awo e tin cu busca un hindervergunning, cual el a pidi na 2000 y nunca a reacciona riba dje. E documentonan a keda entrega siman pasa na corte. Ningun hende ta durf di bisa nada.

Awo pa pone un compania plat pa motibo di un carta cu minister a manda dia 20 di Maart, y dicidi cu no por sigui cu e operacionnan. Con e salarionan ta wordo paga, segun van Opbergen. E decision ta cu nan no por sigui, e ora pa otro luna tur hende ta riba caya, sin un salario. Con nan ta bay cria nan famia, con nan ta paga nan hipoteca, y e resto di obligacionnan. Ta facil pa bisa cu ta clausura e compania. Siman pasa tabata tin un combersacion cu e minister, hunto cu e tres companianan. E minister lo a laga sa dia 13 di April, pero no a tende nada te asina leu.

Van Opbergen ta papia como trahado y no compania. Si un minister tin un cierto responsabilidad riba e isla, y ta bisa si of no, of ta resolve, pero no bin bisa cu lo laga sa despues y no a tende nada. Nan tin miedo di decisionnan inpopular, segun van Opbergen.

Van Opbergen conoce sra. Taakema y nunca no tabata tin problema cun’e. E conoce door cu e ta sali cana cu su cacho. Si tabata tin un problema, e ora hunto ta soluciona hunto.

E borchinan pa core poco poco, e compania mes a pone y ta mantene nan tambe. A traha nan cu nan propio material. Tabata un sorpresa cu e señora a tuma un accion asina.

Inkietud

No tabata tin ningun inkietud, segun van Opbergen. Esnan cu ta biba mas cerca ta biba mas di 500 meter leu. Fuera di esey nan ta situa tras di e sero y no ta causa molester. Si tin molester, ta laga nan sa y ta soluciona esaki.

Stof

Aruba semper tabata tin stof. Of tin cu pone beton of asfalt, e ora no tin stof. Fuera di esey cu henter e naturalesa y santo ta situa na e parti nort di e costa. Biento ta bin for di e direccion ey. Tambe ta haya e stof di Sahara. Van Opbergen ta keda straño. Biento semper ta coy stof y ta hiba den cas di hende.

Caso den corte

Tin biaha mester cana e caminda cu ta necesario. Tin un ley y tin cu bay segun e ley aki. Si mester cana e caminda aki, tin cu haci’e. 90% di e problemanan aki por soluciona, si comunica cu otro.

Pero e minister ta bisa di un dia pa otro cu ta cera e companianan aki y ta cla. Aki tin empleadonan ta traha.

Proyecto

E unico proyecto grandi cu nan a haci ta Green Corridor. Dado momento tambe Watty Vos Boulevard. Pero e clientenan ta e Arubiano comun, cu ta core truck. Cala Romana ta biba di su clientenan local.