Buscando tur forma pa duna un man y soluciona e crisis, problema den famia, violencia domestico, pleito di bisiña, pleito den oficina, hende cu no ta cuminda otro ni den cas di Dios. Famia cu no ta respeta otro ni na momento di entiero, fake news, voicemail di menasa, potret abusivo riba whatssup, facebook, falta di respet pa matrimonio, insulto aki, insulto aya y mayoria di e cosnan aki ta redo. Nan ta noticia falso cu hende cu mente perverso, yena cu malicia ta produci pa un forma of otro causa daño na persona of famia, y cu den e tempo aki a lanta di un forma extravagante.
REDO, CHISME, GOSSIP, RODDELLEN, OF DEN CUALQUIER OTRO IDIOMA no ta cos di awe. For di principio di mundo tabatin redo. Redo ta un noticia sin base, cu su unico fin ta trece problema, haci daño personal of na un famia, y hasta trece division den hogar y hasta den organisacion. Redo ta mas bieu cu Covid. Aworaki tur cos ta Covid, pero prome cu Covid a nace ya redo tabata existi, y aworaki durante di e pandemia aki redo ta e plato faborito pa hopi hende basta nan causa daño na otro.
Hopi hende ta saca secreto di otro pone riba caya, manera paña sushi. Hopi no ta balora amistad mas. Hende no ta importa di susha otro su nomber y despues bisa cu si bo no ta gusta, bay Ministerio Publico, pasobra nan sa cu Ministerio Publico ta bisa bo pa djis pidi un disculpa den corant of otro medio di comunicacion, caminda, bo a causa e daño na e persona y despues e cos a caba. Pero e daño a wordo haci caba.
Bo por imagina cu den e tempo cu nos ta biba aki tin hende ta haci redo pa kibra un bida, of pa trece tristeza den cas di hende. Tin hende ta gaña cu nan a mira algo djis pa susha nomber di otro. Tin hende ta tuma vengansa cu redo pasobra nan envidia a bira insoportabel, y door di esey nan ta prefera intenta na destrui un persona su testimonio of matrimonio, djis pasobra nan no por alcansa den bida locual e personal a alcansa.
Redo tambe ta bini di hende cu tin problema cu menosprecio, cu nan ta rebaha hende, cu nunca ta spera cu e otro lo avansa den bida, y semper nan tin cu inventa algo pa degrada e persona of su famia of su organisacion.
Hende cu ta formula y haci redo a perde integridad. No ta importa ken a haci redo ni tampoco na unda e a hacie, si e ta un persona cu posicion of no. Redo ta keda un forma di traicion, di ataca hende tras di nan lomba. Bo tabata cu hopi hacido di redo ta gusta bruheria y nan ta kere den webo di gay.
Laga nos comparti cu bo locual Bijbel ta bisa di redo y lo bo keda asombra:
Bijbel ta skirbi pa no haci REDO. Levitico 19 vers 16, Salmo 15 vers 1-3, Efesios 4:31, Tito 3 :2 Santiago 4:11, 1 Pedro 2:1 ,1 Pedro 3:10.
Efecto negativo y destructivo di Redo.
1 Samuel 24:9, Salmo 41:7 , Proverbios 17:9.
Redo ta bay contra di bo defensa Spiritual.
Prov 15:4, Mateo 15 vers 18.19. 2 Corintios 12:20, 2 Timoteo 2:16-17.
Hende cu ta haci REDO mester duna cuenta na Dios.
Mateo 12vers 36-37, Jeremias 17;10,
Dios NO ta bendicio na hende cu ta haci REDO.
Salmo 101 vers 5.Juan 8:7 Filipenses 2:3, Colosenses 3:13,14, 1 Pedro 3:9.
Dios ta scucha y mira tur cos Job 34:21,Prov 5:21, Prov 15:3, Romanos 2:2 Romanos 14:10-12 , Filipenses 4:8.
Asina aki nos ta trata di demostra cu REDO no ta di Dios. Por fabor stop cu asunto aki, y nos conseho ta pa busca Dios di henter bo curason, y asina bendicion di Dios lo reina den bo hogar.
Sinceramente,
Pastor Marcel Balootje
