Lito Kock di Polis a splica cu mayoria di e touroperatornan na salida di waf cruseron, ta contento cu e cambionan cu a wordo treci pa reglamenta e parkeer y trafico. Nan mes tabata bisa cu mester a bin un cambio. Nan ta sinti nan mes hopi mas miho, trahando hopi mas relaha. A ripara cu e problemanan ta minimal. Di tempo cu nan a cuminsa cambia e structura, a haci basta cambio. A selecciona tourbusnan nan so entre otro, cual nan ta haciendo riba nan mes. Pero awo ta bay bin algun cos extra pa concientisa e turista tambe, ken ta bende tour, ken no, etc.
E cos ainda ta den proceso, segun Kock. Asina cu tin tur cos cla, lo divulga na publico.
Concretisa
Legalmente gobierno mester concretisa algun cos. Manera e borchinan mester di MB pa nan drenta na vigor. Pesey ta duna tempo pa asina traha MB y ta legalisa pa ley. Si ta pone un borchi y no tin un MB p’e, e ora no por actua. A haci’e preventivo y tambe e lo cay di parti di cuerpo di polis, pasobra mester di e terminonan pa haya e MBnan pa e borchinan.
Area a bira chikito
E problema di e parti eynan ta, cu e infrastructura no tabata pa esaki. A improvisa un tiki. Den futuro lo tin cu bay improvisa un tiki mas, pasobra lo bay habri un gate nobo. Lo mester di bay bin cu un tiki mas informacion, pa e companianan eyfo.
E ta bayendo bon, no tin pleitamento, e hendenan ta trahando contento. Nan mes por bisa cu e cos a drecha basta bon eynan.
Tarea specifico
E team di polis cu Kock ta na encargo di mantencion di orden publico. Aunke cu nan por actua riba mayoria di cos, nan ta Algemene Opsporings Ambtenaar. Nan ta hunto cu APA, ATA, DTP y Gobierno, pa por yega na un solucion eynan cu ta cumbini tur hende. Pa tur hende tin un beneficio di dje.
Cuanto polis
Tin dos patruya tur dia, segun Kock. Nan ta eybou manera cu tin barco, purba di mantene orden publico. Turistanan sa acerca polis tur dia, segun Kock, ora cu nan mester informacion. Ta pesey lo bay bin cu borchinan den futuro, un manera pa identifica e tourguidenan tambe, pa e ta algo mas structura.
Eynan, tin mayoria local trahando of tin hopi aña na Aruba, Lito Kock a bisa finalmente.
