Diaranson anochi Racing Club Aruba(RCA) a tene un presentacion pa tur su miembronan. Aki ta caminda a presenta nan team pa cu e campeonato nobo, tambe a duna inicio pa cu celebracion di nobenta decada di RCA y a batisa nan uniform completamente nobo. E uniform lo mir’e tur caminda y riba tur veld, for di U5 te cu hoofdklas. Jeffrey Lopez ta presidente di Racing Club Aruba. Durante un entrevista cu 24ora.com el a comenta cu e uniform e biaha aki tin un toke special cu ne, pa cual ta haci cu e ta un ‘limited edition’. E uniform ta briya cu rand color oro, esaki ta den cuadro di e celebracion di nobenta aña di e club. Riba e uniform mes carga n’e pecho por aprecia e aña cu a funda e club, esta 1934.
Lopez a comenta cu e staff a keda intacto. Esaki tin di aber tambe cu recientemente a reeligi e bestuur di RCA cu practicamente no a conoce cambio. E biaha aki lo ta diferente. E bestuur lo keda den funcion pa tres aña largo. Pa a haci esaki posibel mester a haci cambio den statuut. No solamente e bestuur sino e miembronan tambe ta di acuerdo cu pa un bestuur por funciona miho, nan tin cu sinta pa un periodo mas largo cu simplemente un aña. Tin un plan integral con e bestuur kier hiba e club dilanti. Tin idea caba con kier hiba no solamente futbol sino e club na proximo nivel. Tin algun plan caba riba papel con kier upgrade e hungadonan y brinda nan e miho experencia posibel. Tur esaki ta forma parti di e plan integral di tres aña.
Un di e cambionan cu lo por mira e aña aki ainda lo ta renobacion di e cura di veld y pa otro aña lo sigui cu e otro plannan. Tur club na Aruba tin necesidad, esaki no ta un excepcion pa RCA. Nan tin hopi necesidad, pero un di esunnan mas grandi ta e veld di yerba. Lopez ta lamenta cu ainda no tin mirando cu den region esaki ta un normalidad. Veld di yerba con cu bo mir’e ta crea un motivacion y animo cerca e hungadonan. Lopez ta solicita comercio pa duna un man cu nan club p’asina nan por kita mas mucha for di caya y laga nan haci algo positivo y alabes; sano.
Cadochi Kock den presencia di hungado y miembro, a batisa dos uniform di RCA. Esun tradicional pero cu toke di oro, esta; cora, blanco y blauw. Pero tambe un color blauw scur cu e hungadonan lo uza. Tin como meta pa ‘back to back’, pues no solamente mantene e titulo campeon den e division mas halto pero den mas categoria di futbol, entr otro di RCA Damas cu tambe kier mantene e titulo. E motivacion den e club ta halto, pa cual automaticamente ta haci cu e bestuur tambe ta anima. Na final Lopez a termina bisando: “Kere den bo mes y bo lo logra bo meta. ”
