Awe marduga pa 3:25 am a sosode un accidente grave na altura di ex-House of Cheng riba Avenida Nelson Orlando Oduber (ex-Sasakiweg). Polis a topa ey cu un auto marca Nissan modelo March color shinishi numera A- 65717, cu tabata pega riba un mata. A constata na e sitio cu tabatin ciudadanonan cu tabata purba re-anima e victima. A pidi presencia urgente di Ambulance y paramediconan na e sitio, cu a haci nan maximo esfuerso pero no por a haci nada mas pa e victima.
Pa 4:09 am Dr. Mungra a constata morto di e homber Ray Kelvin Zambrano Burgos naci na Aruba riba dia 18 di december 1996, pues tabatin apenas 26 aña di edad.
Polis di trafico y polis tecnico a presenta na e sitio pa haci nan investigacion. Slachtofferhulp tambe a presenta na e sitio pa brinda sosten na famia di e fayecido. Headlines Group, cas editorial di 24ora.com y Trempan ta expresa palabra di profundo condolencia na famia di e fayecido y ta desea nan forsa den e momento di tristesa aki.
Aña pasa Aruba a cera cu no menos di 14 morto den trafico. Pa e aña aki, e prome caso di morto den trafico tabata dia 13 di januari 2023, ora cu e polis Austin Illes a fayece na Macuarima. E di dos caso tabata dia dia 5 di mei 2023, ora cu Ruby Garcia a fayece tambe riba e mesun Avenida Nelson Orlando Oduber.
