Tabata tin hopi awasero den fin di siman. Santa Rosa awor aki ta enfoca riba e damnan. Segun Randy Maduro, vocero di Santa Rosa, a splica cu no tin peliger. Awa a yobe durante e fin di siman aki bastante hopi. Santa Rosa no solamente ta contento cu esaki, pero nos agricultor, productornan local ta sumamente contento cu tin mas awa. Aunke cu e damnan tabata full bashi. Awor aki tin mas awa. Tin algun dam cu no ta completamente yen si ainda, pero nan tin hopi awa aden. Pa e temporada nos dilanti, esnan cu kier planta, dal bay, pasobra tin awa of yega na Santa Rosa, unda cu tin truck. Haci un peticion unda cu por transporta awa di dam. Awa tin y ban planta.
E damnan cu ta yen si ta entre otro Rooi Afo. Esaki no ta causa un problema pasobra si e bay over mes e ta sigui core pasa riba caminda bay den rooi. Esun di Noord tambe tin awa aden, pero ainda falta mas. Tambe na Kas Ariba ta basta yen, pero tambe tin luga pa un poco awa mas. Na Sabana Grandi tambe tin awa den dje. Atrobe, tambe tin luga pa poco mas. Kiermen, no tin ningun peliger. Pa casualidad, na e momentonan aki tin coleganan cu ta sigui tira bista rond. E damnan cu nan no a logra yega den fin di siman, lo miranan awe pa mira e situacion di sushi cu tin den nan, pa asina por controla esakinan y tambe si por haci limpi rond, na rand di e damnan, esey ta wordo haci ainda durante e simannan cu ta bay bin.
E awa
Segun Randy Maduro, logicamente ta controla e awa prome y si e ta bon ta dal bay cun’e di biaha. E ta wordo controla debidamente y e ta sigur cla pa planta.
Tin hopi sushedad toch
Santa Rosa ta bezig cu limpiesa. A haci esaki caba den transcurso di añanan. Atrobe e problema ta keda, mirando cu cierto individuonan ta bay tira sushi, por ta den un rooi. Esaki, si awa yobe, ta lastra bin cun’e na e dam. Mucho control no tin di esey. Tin hende ta tira e sushi scondi. Mester sa bon na unda esaki sa tuma luga, pero atrobe. Una bes cu esaki yega na e dam, Santa Rosa ta percura pa haci esaki limpi.
Traha mas dam
Maduro a comenta cu trahamento di mas dam ta un bon opcion. Hopi awa ta bay lama y mas awa nos tin, mas contento nos agricultornan ta. Pero un biaha mas, pa cobamento di dam, mester tene cuenta unda, kico, etc. E no lo ta un mal idea.
E pasada di awa
E ruta di awa ta keda mesun cos, pero casnan ta wordo traha aki aya. Esnan cu ta traha cas tambe tin cu corda tene cuenta pa den e cura, laga un buraco den dje. Si e cura ta yena cu awa, e awa por pasa via di e buraco ey, sigui su caminda pa e rooi, te ora cu e termina na e dam. E ta mas of menos mesun cos te ainda.
Peliger
Por a mira baricada por ehempel na Dam di Rooi Afo. E dam ta yen, segun Maduro. En principio, no tin un peliger. Logicamente muchanan ta bay hunga na banda of baña den dje, e por bira peliger. Te na e momentonan aki e no ta un peliger, pero e ta wordo controla door di Santa Rosa. Tur hende por bay coy awa na dam y muha mata, haciendo uzo di dje concientemente. No bin cu trucknan septico, chica awa, pasobra una bes esaki tuma luga, ta daña full e dam.
