Structura di inverti den mes un negoshi di e mes un compania y doño ta indicacion di movecionnan straño tumando luga, cu ta muestra ademas di cu lo tin actonan dudoso cu ta tumando luga. Den henter e proceso di ENNIA, tin un investigacion tumando luga n’e momentonan aki. E echo cu tabata saca placa for di ENNIA, pa supuestamente haci un inversion den mesun compania, ya caba ta algo cu no ta cuadra.
Parlamentario di Movimento Futuro Korsou (MFK), Ramon Yung, a bisa cu ora cu a saca un parti di e placa, manera Banco Central a splica, ora cu a saca placa for di ENNIA Pensioen y a mand’e pa e Departamento di Inversion. Pero ora cu e ultimo aki haya e placa y bay inverti otro caminda, Banco Central ta bisa cu e no tin supervision di e banda ey.
Ta aki ta caminda cu a pone Mullet Bay como garantia pa aumenta e activonan di ENNIA Pensioen. A uza un ehempel di coy un tereno hinc’e den ENNIA Pensioen pa 50 miyon. Kisas despues e balor a aumenta na 300 miyon, di cual ta saca 200 miyon pa inverti otro caminda, pa saca rendimento.
Sinembargo, ora cu a haci e inversion den ENNIA Pensioen pa cierto montante, e balor di e asset no ta cuadra. Aki ta caminda cu a constata cu tabatin cosnan straño pasando, cual a genera duda. Esey a haci cu a bay investiga mas a fondo di kico ta pasando, segun parlamentario di Partido MFK, na nos isla ruman Corsou.
Cu a pone un propiedad como garantia, cu no tabatin e balor suficiente p’e inversion, a cada c’un diferencia grandi. Ademas, di esey, e placa cu a saca pa bay inverti den otro compania, cu despues a resulta di ta di Ansary mes.
Ora di haci inversion pa saca rendimento, no ta prudente pa inverti tur e placa den e compania di e mesun entidad, ya cu si algo bay robes, den un solo biaha ta perde tur loke a inverti.
