“Shon, b’a divorcia un hende, pero b’a casa cu ‘n otro. Mi ta un otro partner. Bo no por sigui trata mi manera b’a trata tur e otro partnernan chikito. Respet mutuo ta cuminsa na bo mes”, asina mr. Raymond Kamperveen, miembro di parlamento di partido Raiz a bisa ayera durante un entrevista exclusivo den e noticiero Enfoke.E partido politico hoben obviamente no a keda contento cu e hecho cu, no obstante a manda pregunta via parlamento pa haya mas informacion riba e firmamento dudoso y cuestionabel entre Eagle LNG y WEB Aruba NV, cu deliberadamente Minister Glenbert Croes a keda sin contesta.
Es mas, ora cu a pidie pa para e firmamento el a bisa cu e contract ta firma masha dia caba (manera 24ora.com a informa) y cu e acto di ayera tabata mas bien simbolico.
Fraccion di Raiz den Parlamento a indigna masha pa esaki y mesora a yama nan ministernan den coalicion pa informa di nan pensamento. A acorda cu nan lo uza tur locual ta na nan alcance via e sistema parlamentario, manera ta un reunion publico, por organisa un encuesta parlamentario of tambe por manda e gobierno cas. Kamperveen a bisa cu esey entodo caso no ta su prome opcion, pero e ta riba mesa si no tin respet pa partnernan den coalicion.
Raymond Kamperveen a keda asombra cu, a scucha WEB menciona cu for di 2010 nan ta bezig cu gas, cu ta negociando cu e grupo aki for di lunanan atras caba y nunca a yega porta di parlamento ni den conseho di minister pa pidi sosten y aprobacion. Raiz ta pushando pa baha e uzo di combustibel tradicional y pa promove energia renoba, mientras cu MEP ta pasa tra’i na lomba firma un acuerdo di 20 aña largo pa uza gas. Asina nunca Aruba por cambia pa energia mas limpi y pa porfin por baha prijs di awa y coriente riba nos isla.
