Recientemente Minister di Adulto Mayor, Ursell Arends a publica un rapport despues di dos edicion di e ‘Foro Nacional pa Adulto Mayor’. E minister, mescos cu mayoria politico, ta di opinion cu tabata un tremendo foro y cu hopi idea, acuerdo y perspectiva realistico pa futuro. Hasta a firma un Convenio Nacional. Claro, den henter e minister su comunicado, el a lubida di pone con kier financia su plan. E rapport bou di e nomber ‘Rapport Foro Nacional pa Adulto Mayor’ cu ta consisti di diescinco pagina, ta para riba e penultimo pagina cu pa financia e ‘ouderenzorg financiering’, ta pensa di aumenta BBO of BAZV. Claro, un medida extra p’e pueblo. No ta conoci si su partner den coalicion ta di acuerdo cu e plan aki, mirando ningun caminda rib’e rapport ta mira firma di un minister di MEP. Ta mas bien un plan di e Minister di RAIZ, Ursell Arends y su foro cu el a organisa hunto c’un departamento nobo cu el a lanta, esta Directie Ouderenzaken.
E foro a tuma luga riba 17 y 18 di october 2023, djey un biaha mas na maart 2024. Durante e foro a participa mas o menos 150 profesional di diferente tereno. Entre nan di salud publico, sindicato, politico, organisacion cu ta representa un grupo di e grandinan y mucho mas. Den e rapport a indica cu 1/4 di nos poblacion ta personanan riba 60 aña. Pa cual, actualmente t’e grupo cu varios politico tradicional manera Mike Eman y Otmar Oduber ta purba gara nan pa ricibi voto p’e proximo eleccion parlamentario. E dos politiconan menciona a haci diferente promesa caba p’e grupo di meta (doelgroep) aki. Por lo menos Mike Eman a priminti nan cu e lo aumenta nan pensioen cu 50% y lo duna nan bek remedi gratis manera antes.
Na final di e foro, a firma un Convenio Nacional pa bintiseis organisacion. Temanan principal di e convenio aki ta e calidad di bida di e adulto mayor, e situacion financiero, atencion na cuido y mucho mas. Minister Ursell Arends, alabes lider di RAIZ, a institui un grupo di trabou bou liderazgo di Marion Agunbero. Esaki a tuma luga despues di e prome foro. E meta cu e grupo di trabou aki tin, ta pa; brinda conseho y crea un miho relacion entre sector publico y sector priva. For di e foro a nace hasta un proyecto yama “Proyecto Pasadia” cu tin como meta pa un mehoracion di calidad di bida di nos grandinan.
Tin diferente proyecto cu kier realisa, entre otro riba tereno di SABA mirando cu tin hopi tereno disponibel. Riba e penultimo pagina di e rapport, n’e seccion di ‘ouderenzorg financiering’, ta papia di un aumento di BBO/BAZV y ainda mas pa introduci un impuesto extra p’e turista(medida) y mas cobransa p’e cumprado di cas di afo y bendemento di edificionan di gobierno bashi. Esaki ta plannan cu tin poni riba papel, pero ta di spera pronto cu sea e minister duna mas clarificacion si politicamente e tin e sosten pa aumenta BBO y BAZV cu su partner den coalicion of ta simplemente consehonan ricibi y cu no necesariamente tin cu cumpli cu ne. Pero na final, ora bo firma un documento, ta sinonimo na: “Mi ta pro”.
E frase ta bisa bon cla: “Verhoging van verheidsinkomsten voor zorg door verhogen van belastingen zoals BBO/AZV-heffingen, het invoeren van een toeristenbelasting, heffing op huisverkoop aan buitenlanders en het verkopen van leegstaande overheidsgebouwen”.
Loading…
Reload document 
Open in new tab Tocante RAIZ:
Tai Foo Lee & Ursell Arends a funda Partido RAIZ dia 9 di Juni 2017. Lider desde fundacion ta Ursell Arends y a participa dos biaha den eleccion, na september 2017 y juni 2021. Record maximo di voto: 5481 (2021) y record minimo di voto: 2107 na 2017. Ideologia di Partido RAIZ ta social democrata, progresivo y liberal.
Tocante Ursell Arends:
Ursell M. Arends a nace na Santa Cruz. Na aña 2000 el a bay studia Business Administration & International Business Management na Merca y Canada. Desde aña 2007 e ta tragando y a crece den su funcion y yega te na Operations Director na La Quinta Beach Resort. Entre 2016 y 2018 e tabata presidente di Aruba Timeshare Association (ATSA). El a funda Raiz den 2017 y den su prome salida a logra 1433 voto riba su nomber. Den eleccion na juni 2021, Ursell Arends tabatin 1939 voto personal, cu ta representa un aumento di 35%.
