Diasabra ultimo, dia 2 di december, YMCA Dakota a experencia un metamorfosis di fin di aña cu a transforma e conocido centro comunitario aki den un fabuloso mercado di pasco. Bishitantenan por a disfruta di un anochi sumamente ameno, cumprando nan bunita prenda, regalo y artesanianan local, delicianan casero manera cuki, bolo, dushi di lechi y Ponche Crema, decoracion y obranan di man pa e temporada di fin di aña, como tambe saboria di un gran variedad di sopi tipico di Aruba, platonan festivo preferi manera ham horna, ayaca y sanger yena.
Pa entretene e publico, Pierewietje y Flash a duna un bunita presentacion y tambe grupo di gaita Muchanan di Mama Rosa a sa di deleita tur presente cu nan ritmo y melodia te den e ultimo oranan di anochi.
Movimento RAIZ kier a probecha e oportunidad aki pa gradici tur e boluntarionan cu a traha cu tanto entusiasmo y dedicacion, cada participante cu a contribui cu nan talento y creaccionan unico, sea den forma di artesania, obra di man, publicacion di buki, delicia of specialidad unico, canto, baile, musica, tambe tur e colaboradornan, sponsors y e team di YMCA Dakota pa ofrece un excelente localidad. Y por ultimo, pero sigur no cu menos aprecio, team RAIZ keir a bisa danki na tur e bishitante y sostenedornan pa nan confiansa y sosten for di inicio di e movimento te cu awe.
“RAIZ t’ey pa keda,” lider di partido, sr. Ursell Arends ta agrega. “E fin di aña aki nos ta celebra nos cosecha, pero sigur nos lo sigui sembra nos simianan den 2018.”
Pues, keda pendiente y sigui e movimento nobo aki via rednan social manera Facebook, Instagram of bishita nan website: raizaruba.com y join the movement!
