Un tema cu ta hopi den boca di pueblo t’esun di labamento di placa y aumento di trafico di droga cu ta lantando cabes na Aruba.
Segun presidente di Rainbow Warrior Core Foundation, Milton Ponson, recientemente tabatin un intercepcion pa Wardacosta Hulandes di un monton di droga riba barco carga, cu marihuana, cocaina y otro substancia prohibi.
Ora cu por mira cu den apenas un luna y mey, mas di seis cargamento intercepta y durante fin di siman tabatin varios bulto cu a spula bin ter na Grapefield na Aruba, supuestamente fo’i barco intercepta pa Wardacosta te na Boneiro, mester ta bisto cu trafico di droga a aumenta drasticamente entre e islanan ABC.
Ta un indicativo di un tendencia sumamente alarmante segun Ponson. Ora traficacion di droga ta subi alarmantemente, e ta nifica cu di un manera of otro, cierto gremio rib’e islanan aki ta sinti nan mes cu e necesidad pa amplia nan entrada di placa cu actividad criminal manera trafico di droga.
Tur hende por corda cu yen di elogio tabatin den e ultimo ocho aña p’e combatimento di traficacion di droga rib’e islanan ABC, unda cu Hulanda a pone recurso humano y financiero disponibel pa combati narcotrafico.
Te cu tabatin papia cu e narcotraficantenan tabata opera fo’i teritorio Venezolano, cu bendicion di e gobierno di Nicolas Maduro, fo’i unda e droga tabata procede, sea fo’i Colombia of Peru, transporta bao guia di militar di Venezuela, te na su costa, unda cu e droga tabata poni riba barco y na su turno nan tabata sali pasa e islanan ABC, cu destino final, unda e droga lo tabata poni riba barco pa bay entre otro continente Mericano y Europa.
Recientemente gobierno a anuncia cu Aruba a sali number dos riba e lista di FATF, esta e organisacion internacional cu ta dedica su mes na combati labamento di placa y financiamento di terorismo. Obviamente e reis di esaki, cu tin hopi caso ta, traficacion di arma ilegal y traficacion di droga.
Segun Ponson, si pone e dos cosnan aki band’i otro y tuma na cuenta cu na Aruba situacion financiero, economico ta hopi penoso, cu gremio comercial, incluyendo esun mas recien crea Comerciantenan Uni Aruba, cu practicamente tur dia ta duna comentario rib’e efectonan desastroso cu introduccion di BTW ta bay tin, e efectonan desastroso di aumento di prijs di energia, e efectonan desastroso di aumento di tarifa di awa y coriente y factor cu ta pafo, fuera di nos alcance como isla, esta factor riba mercado internacional di ‘commodities’ y energia, como tambe mercado financiero, obviamente algun instancia y algun gremio cu menos escrupulo lo por ta reconsiderando aumenta nan entrada via actividad no legal y obviamente, mirando pasado di Aruba y manera Nelson Orlando Oduber a yeg’i bisa den un entrevista cu Associated Press: “Si ta berdad cu tin labament’i placa na Aruba, pero di algo nos mester biba aki n’e isla aki,” aparentemente labamento di placa a cuminsa aumenta aki na Aruba.
Mester ta bon consciente, cu si tin droga cu ta transporta y intercepta den nos awanan teritorial di Aruba, Boneiro y Corsou, obviamente mester tin laso tambe di labamento di placa di e actividadnan aki rib’e tres islanan.
Henter e asunto aki di FATF, cualificando Aruba como un pais caminda labamento di placa ta combati den un forma efectivo, ta hogbosh. E realidad ta, cu ora trafico di droga mediante nos islanan ta aumenta, mester tin y a mira recientemente den e ultimo intercepcionnan di droga, un monton di Arubiano a detene, indicando cu si tin Arubiano envolvi den traficacion di droga. Tin Arubiano tambe envolvi den labamento di placa di e droga aki. Ora cu mira e tamaño di e intercepcionnan y cu cada biaha 500 kilo bay ariba, ta un traficacion di droga formal ta tumando luga.
Pues un labamento di placa formal ta tumando luga aki na Aruba. A bira ora pa gobierno stop di gaña y tira santo den wowo pasobra pueblo mes ta mira cada biaha cu ta intercepta droga, cu tin hende local envolvi. E traficacion aki di droga, e labamento di placa aki cu tradicionalmente semper a tuma luga via Corsou y Aruba, keto bay ta tumando luga.
Ken nos ta gaña aki na Aruba cu nos isla a bira “squicky clean”. Danki n’e crisis financiero, e malonan di antes, traficacion di droga y labamento di placa a cuminsa lanta cabes atrobe. E por conduci cu pronto por pone Aruba bek riba lista preto cu no ta cumbini nos nada, mirando cu nos ta den temporada di crisis formal financiero economico,” ta loke cu Milton Ponson a bisa por ultimo.
