Awe ta dia dos pa loke ta e colecta di firma y pueblo ta respondiendo. For di ayera, dialuna, cual tabata e prome dia, un partido a logra pasa e prome fase, cual ta haya suficiente firma pa por bay pa eleccion 2021. Esey tabata partido MAS, encabesa pa Marisol Lopez-Tromp.
Awe mainta, partido RAIZ, lidera pa Ursell Arends, a sa di sigui e siguiente paso, mirando cu e tambe a logra su 587 firma.
Awo ta keda na e demas partidonan pa haya nan respectivo firmanan. Pueblo ta respondiendo, pa asina mustra cu tin democracia riba nos pais.
Varios votado a sa di yega na diferente edificio di MFK tanto na Noord, Savaneta y e Dependance di Censo riba LG Smith Boulevard, pa asina nan duna sosten na e partidonan cu mester haya firma pa nan por sigui e siguiente fase, cual ta eleccion.
Un firmante a comenta cu el a bin yuda un di e partidonan chikito. E ta sigui splica asina pueblo por scoge mas miho, fuera di e dos partidonan grandi.
Pa por firma pa un partido chikito of cu no ta den parlamento, ta bon pa nos democracia. E ora tin diferente opinion cu no ta di e partidonan tradicional, cual ta e dosnan cu ta dicidi, segun e votado.
Un otro ciudadano a bin sostene un di e partidonan cu sea pa prome biaha ta participando y of cu no a logra haya suficiente voto eleccion pasa y cu ta pafo di parlamento.
El a comenta cu el a sigui e rekisitonan di presenta cu un identificacion valido y despues mester a yena un formulario.
El a comenta e mester a firma. Sinembargo tocante e firmamento mes, e ta mira cu una bes, pa ley, cu si firma algo, supuestamente mester haya un copia di dje. Nan ta djis pone den un baki patras y esey ta tur.
E ciudadano ta pensa cu e sistema aki no ta bon. Pasobra facilmente e hendenan por saca esaki y pone cierto cosnan un banda.
Nan mester wak e cos bon, segun e ciudadano. Otro cos cu el a tende di dje, ta cu riba dia di eleccion, e formulario cu ta haya pa yena cua partido ta vota pe, normalmente ta dobla y hinca den e stembus direct. Pero e sistema di scanner, no ta haya cu ta bon. Loke cu e pone riba papel, e ta cer’e dobl’e y tir’e directamente den e stembus. Esey ta loke e ta bay haci tambe.
Un otro ciudadano tambe a sa di presenta na un di e MFKnan pa deposita su firma pa asina duna sosten na un di e partidonan cu tin mester di e cantidad rekeri, pa nan sigui cu e siguiente paso, cual ta eleccion dia 25 di juni.
Segun e ciudadano, esaki sigur lo por trece un cambio riba e isla. E kier wak kico e otro partidonan ta haci y trece dilanti.
E ta pensa tambe cu tur hende kier mira un cambio, un cambio berdadero. Un cambio con nan por goberna e pais, door di sostene tur esunnan laga un banda door di e partidonan grandi y ta spera cu e partido cu el a sostene cu su firma, ta uno cu lo t’ey pa e ciudadanonan.
Un otro ciudadano firmante a splica cu si mira bon, AVP a laga hopi di desea. MEP a bin cu algun cos di Hulanda cu nan a tuma over y esey no ta bon.
Mester yuda e partidonan chikito pa por forma un gobierno. E ciudadano aki a bisa cu semper el a sostene partido PPA y te awe, e no ta bay laga nan cay.