Diadomingo 21 di april a tuma luga e evento di Aruba Dag na madre patria Hulanda, pa ta exacto na Broodfrabriek n’e capital politico di Hulanda, Den Haag. Un evento cu alrededor di 2300 persona a asisti pa cual por carga mas o menos 4500 persona. Durante e presentacionnan a nota cu dos artista a “hit the floor”. E prome, Jonathan Croes despues di presenta su ultimo cantica, a trompica y cay riba stage.
El a lanta mesora y cana bay patras. No a dura mucho cu e banda Tsunami a duna nan presentacion. Un di artista principal di e banda cu ta forma e front, esta Bradley Versprey miho conoci como “Eazy B” tambe a pasa den un situacion. Contrario na Croes cu a cay riba stage, Eazy B a cay for di e stage.
Ta net n’e momento cu tabata cantando su hit “On my way”, pa un descuido a faya y cay for di e stage. Tin cu menciona cu no ta prome biaha cu Eazy B ta cay for di stage. Aña pasa tambe el a cay for di stage durante su presentacion na Caiso y Soca Monarch.
Despues cu el a cay, Eazy B a sigui canta normal: “Ohhh, when the band pass, and the truck pass”.
