Na juni ultimo Stichting Reclassering en Jeugdbescherming a cuminsa su campaña pa busca mas mentor boluntario cu kier haci un diferencia den e bida di nos hobennan y mustra nan cosnan positivo den bida. Tambe a lansa un jingle composita door di Caiso King 2020, Carl Roosberg jr “Galloway Jr” cu por cierto a wordo ricibi cu man habri den comunidad.
E acogida tabata uno grandi y Stichting Reclassering kier a duna danki na tur esnan cu a aplica y a mustra interes den e proyecto. Te cu awor a haya 25 persona cu a mustra interes pa ta mentor boluntario.
Mirando e situacion di COVID-19, no a logra comunica cu tur esnan cu a aplica den e tempo stipula. Pa e motibo aki Stichting Reclassering kier a informa tur esnan cu a aplica, cu den e dianan venidero nan lo ricibi un email of yamada di pa asina cuminsa cu e proceso pa bira un mentor boluntario.
Cu tur e medidanan di social distancing rond di e COVID-19, Stichting Reclassering a bin cu un forma creativo y proactivo pa cu e proceso di training y lesnan pa bira mentor. Den un forma creativo y dinamico lo duna e lesnan online. Ta haci apelacion na tur futuro mentor pa haci investigacionnan tocante e organisacionnan aki pasobra lo tin un sorpresa plania pa nan. Keda pendiente!
Por ultimo Stichting Reclassering kier a duna danki na Carl Roosberg “Galloway Jr” cu ta sosteniendo e campaña for di comienso. Tambe ta manda danki atrobe na tur esnan cu a aplica pa bira un mentor boluntario. Y un danki na tur radio emisora cu a yuda promove e campaña, muy especialmente Massive 103.5 Fm.
