Financiamento ta cla, fiadonan tin e placa cla, pero no por pasa e mas o menos $275M pa e cuenta di banco di Aruba Airport Authority tanten cu renobacion y/of alarga e contract existente entre Gobierno di Aruba y Schiphol Group no ta regla. Consecuentemente gerencia di Aeropuerto mes a dicidi di para e proyecto Gateway 2030 te ora tin claridad riba e tema importante aki.
Finance Quest a busca financiamento
E compania local Finance Quest a gana e destaho pa busca financiamento pa e proyecto aki. Ta trata aki di dos ex trahado di AIB-Bank cu a cuminsa awor riba nan mes y a logra un proyecto multimiyonario pa financia. Nan trabou ta cla, te cu a manda cobra Aruba Airport Authority N.V. caba, pasobra ta Aeropuerto mes a opta pa paralisa e proceso pa pasa e placa di prestamo.
Schiphol Group no mester para garantia pa e financiamento
Ta bon pa aclaria cu e banconan no a pone como condicion cu Schiphol Group mester para garantia pa e prestamo. Ta den cuadro di transparencia, AAA N.V. mes a opta pa informa nan di desaroyo di nan contract di operacion. Locual si algun di e banconan internacional a trece padilanti ta cu nan ta “prefera” pa Schiphol Group mes keda cu maneho y operacion di Aeropuerto di Aruba durante e proyecto. Esey ta nifica cu mester alarga e contract vigente, cu ta vence na September 2019, pues otro aña. Tene cuenta cu kier pa Schiphol Group supervisa e protecto di construccion so, pasobra e fiansa mes ta varia entre 10 of 15 aña largo.
AAA N.V. kier alarga e contract cu Schiphol Group
Mientras cu gerencia di Aruba Airport Authority N.V. a opta pa paralisa e proyecto temporalmente, Hunta di Supervision ta den contacto cu Schiphol Group pa mira con ta yega na alarga e contract existente cu 4 pa 5 aña mas, durante e proyecto Gateway 2030. Mayoria ehecutivo di Schiphol Group na Hulanda ta cu vakantie ainda, pa cual ta spera cu den 1 pa 2 siman lo por ta asina leu cu un delegacion di Aruba ta sali pa Hulanda pa negocia y regresa cu un acuerdo firma. Ta bou di e impresion cu tin boluntad politico pa continua e relacion entre Schiphol Group y Gobierno di Aruba. Hunta di Supervision ta conta cu un miembro menos, despues di Rafael Croes a haye ta tuma retiro forsa. Marion Kan, e Vice Presidente di e Hunta awor ta na cabes temporalmente.
Asina cu tin claridad, lo firma e fiansa
“E obligacionnan y documentonan financiero relaciona cu e financiamento di e proyecto a wordo finalisa, pero gerencia di AAA a scoge pa retrasa e ceramento/firmamento di esaki te ora tin mas claridad riba e contrato di cooperacion cu Schiphol Group. Te cu asina leu e retrasonan pa e proyecto Gateway 2030 ta manehabel y no a crea problema significante”, asina Hendrik Croes, Vocero di Aruba Airport Authority N.V. a duna di conoce.
Gobierno no tin espacio pa para garantia
Aunke cu banconan no a inclui e condicion cu Schiphol Group mester para garantia pa e prestamo, e hecho cu nan ta sugeri pa nan keda mientras e proyecto ta andando ta duna suficiente indicacion di e direccion cu nan ta bay. Gobierno di Aruba di otro banda no ta den posicion awor aki pa para garantia tampoco pa un fiansa di 275 miyon dollar, pasobra esey lo bay riba nos balans di debe, cu tur consecuencia cu e lo bin cune pa cu e reglanan acorda cu CAFT.
Relacion di Schiphol Group y Gobierno di Aruba
Pa casualidad, Schiphol Group a bini Aruba bou maneho di Minister Eddie Briesen di MEP na aña 2003 mas o menos. E tempo ey, apenas a asumi poder na final di 2001, a bin hereda un Aeropuerto cu 128 miyon na debe na bondholders y 21 miyon na debenan vigente. Cu bondholders cla pa tuma accion, Minister Eddie Briesen e tempo ey a combersa cu Erwin Croes di KPMG cu tabatin experencia di Schiphol Group na Hulanda pa habri negociacionnan. A yega na un acuerdo pa algun aña, pa nan prepara un Arubiano pa sigui despues di 5 aña. Sinembargo, Schiphol Group a yuda saca AAA di tur nan debenan den apenas 3 aña di tempo, pero te awe nunca a haci suficiente pa tin un ehecutivo local cla pa tuma e compania over.
Na luna di mei 2015 Minister Otmar Oduber a renoba e contract pa 5 aña mas bayendo atras retroactivo. Esey ta vence awor na September 2019.
Opinion mixto den Conseho di Minister
No tin unanimidad den e decision cu si ta sigui cu Schiphol Group of no. E Minister cu mester tuma e decision ta Dangui Oduber, pero e ultimo palabra ta den Conseho di Minister como “Aandeelhouder” di e compania. Ey tin Minister cu ta prefera pa Gobierno mes tuma maneho di e compania over, mientras cu otronan ta puntra si no tin mas compania cu por opera e Aeropuerto pero cu miho condicionnan. Tin di e Ministernan ta sinti cu Schiphol Group deliberadamente ta añadi den tur contract cu ta prepara un Arubiano pa maneha e compania pero no ta cumpli. Tambe a acorda cu pa aña 2020 mester ta maneha 3 miyon pasahero pa despues sigui pa 5 miyon pasahero, loke no ta pasando ainda.
Asina vakantie caba mester bolbe na realidad
Mientras cu dianan ta pasa, e tardamento den ehecuta plannan pa ampliacion di nos Aeropuerto lo cuminsa mustra su consecuencianan. Entrante dia 1 di juli a aumenta Airport Tax cu 40% precisamente pa cubri e proyecto aki, pues si no ta ehecute, lo mester baha e impuesto bek. No ehecucion lo stroba plannan di ampliacion di buelonan tambe, cu lo haci dificil pa alcansa e 5 miyon pasaheronan cu nos ta anhela. Pero ta parce cu tur cos ta contecta na otro: Si no firma cu Schiphol Group bou di su condicionnan y terminonan, lo NO tin fiansa. Si no tin fiansa, NO por sigui cu e proyecto di Gateway 2030. Y si no amplia nos facilidadnan, tur e proyecto pa e parti Americano, cu maletanan y mas opcion pa US CBP Pre Clearance ta cay na awa.
