Awe, diamars, a tuma luga inauguracion di e edificio nobo di Stichting BOB, cual ta situa den vecindario di Hospital dr. Horacio Oduber, como tambe mashin nobo pa asina haci e servicio di e fundacion posibel.
Tabata tin varios invitado durante di e evento aki, di cual un di nan tabata prome minister Evelyn Wever-Croes.
Durante su discurso, el a expresa cu Stichting BOB a cuminsa cu un soño di un grupo di hende cu tabata tin e vision di traha realmente riba loke ta prevencion y investigacion.
Ora cu el a cuminsa, naturalmente sin fondo, tabata tin retonan grandi. Pero si mira kico Stichting BOB a haci desde principio te na momento di inauguracion di e edificio nobo, ta mustra cu soñonan por bira realidad si tin un plan, si tin determinacion y si tin curason p’e. Y e Team a haci esaki posibel.
Gobierno di Aruba ta gradici y felicita e team pa e trabao grandi cu a haci y ta haciendo. For di awo en adelante, ora cu mira kico tur realisa y tende ki e soño y plannan ta, manera pa expande investigacion riba malesanan den tripa of por ta, ken sa, paptest, etc., tin tur confiansa cu lo logra cosnan hopi mas grandi.
Awo cu e edificio nobo den centro di cuido di salud y como un hende muhe y como mama, prome minister a comenta cu si tin un cos cu por haci ta, stima bo mes, stima bo famia, controla bo mes, samina bo pechonan y haci uzo di servicionan cu Stichting BOB ta ofrece.
Di experiencia e prome mandatario por bisa cu si detecta algo na tempo, por ta no a ni sinti’e ainda, pero a bin haci screening y a detecte, por trat’e. Si ta na tempo, por cur’e y por tin un miho calidad di bida. Esaki hende muhenan debe esaki na nan yiunan, na nan pareha, famia, etc. Un apelacion ta bay na tur hende muhe cu servicionan di Stichting BOB ta habri pa tur hende. Cada dos aña por haya un screening. Por fabor haci uzo di dje y asina ta tuma e control riba propio salud. “Si bo ta stima bo yiunan, bo nietonan, ban tuma control riba nos salud y samina nos mes regularmente,” tabata palabranan di prome minister Evelyn Wever-Croes.
