Pa algun tempo e proyecto di hotel na Seroe Colorado ta para. Tin esunnan cu ta di acuerdo pa bin cu ne pasobra ta mira cu e ta genera trabou, pero tin otro cu no ta di acuerdo pa motibo di naturalesa, ta daña bista y capacidad. Ultimo aki no ta tende hopi kico e ultimo desaroyonan cu e proyecto aki.
Prome minister mr. Evelyn Wever-Croes durante programa di Hans Geerman a splica mas dje desaroyo. E mandatario a indica cu tabatin un caso den corte, tin algun habitante den e bario no kier p’e hotel bin eynan. E caso tabata atendi y hues a bisa cu mester saca un beschikking nobo. A haci esey, segun e mandatario.
El a sigui splica cu nan a reuni cu e desaroyadonan. Despues di esey nan no por a cuminsa di biaha, pasobra e proceso specialmente e structura di acero cu nan ta traha, ta haci den exterior. Nan a perde e secuencia cu e fabrica cu tabata trah’e. Ora a keda cla cu cumplimento di hues, nan mester a pone bek aden e ordo y ta pendiente di esey.
Prome minister a indica cu e desaroyado mes a calcula cu nan ta bay cuminsa bek na augustus of september cu e trabounan. Awo cu e mandatario ta bek, e lo bay tuma contacto cu nan. E ta haya cu esey ta algo importante, pasobra e ta bay trece desaroyo unico no solamente pa San Nicolas, pero pa henter Aruba.
