Gobierno di Aruba a tuma nota di e caida di Gabinete Rutte III. Gobierno tabata sigui e desaroyo aki ya pa algun dia y por a mira cu esaki lo a bin. A base di e ‘Toeslagenaffaire’ den cual a trata miles di mayor hopi malo door di departamentonan di Gobierno na Hulanda, esaki a conduci pues cu e Gobierno a cay, Prome Minister Evelyn Wever-Croes a declara.
E hecho aki no tin mucho impacto mirando cu ya e eleccion ta planifica pa tuma luga na maart. Pues ya caba e periodo di preparacion pa eleccion ta stipula y ta algun siman so tabata falta di e Gabinete Rutte III. Pa Aruba esaki no tin consecuencia, Prome Minister Wever-Croes a pone enfasis cu a verifica esaki mainta cu Hulanda.
E palabracionnan haci cu Hulanda ta pa un periodo di seis aña y palabracionnan ta haci entre dos Gobierno pues locual cu a palabra ta keda vigente tambe si Gobiernonan cay. Esaki ta nifica cu e sosten di likides cu Aruba ta haya for di Hulanda no ta impacta.
‘Mester bisa cu Aruba ta sigui haci tur di su parti pa cumpli cu e condicionnan pa por haya e finananciamento cu falta pa e prome ‘tranche’ di e aña aki cu ta januari-februari-maart.’
Por ultimo Prome Minister di Aruba ta desea e politiconan Hulandes hopi forsa y exito den e periodo aki.
“Pa e pueblo Hulandes esaki ta cay un poco fastioso pa motibo cu un Gobierno demisionario den un crisis di Corona no ta algo faborabel, sinembargo no por otro y den esaki ta desea nan hopi exito”.
