Diadomingo anochi prome minister di Aruba mr. Evelyn Wever-Croes a tene un discurso nacional riba e ultimo desaroyonan. Gobierno ta haya cu Aruba ta riba e caminda di recuperacion.
“E berdad semper no ta bunita, y beyesa no semper ta e berdad. Como gobernante bo mester e curashi pa acepta e realidad. Pa compronde e diferencia di goberna no cu ilusion pero cu realismo, cu vision di optimismo pa produci solucion berdadero. Ora nos a sali dje punto mas critico di e pandemia y nos a kere cu nos por recupera trankilamente, nos a wordo confronta cu otro crisis. E conflicto na Ucrania cu efectonan devastador pa henter mundo. Prijsnan di crudo, gasolin a aumenta drasticamente den tur pais,” e mandatario a bisa.
E mandatario a indica cu na Aruba tambe pasobra aki ta importa e gasolin ey. E prijsnan di producto na supermercado na tambe a cuminsa aumenta, pasobra n’e pais cu nan ta produci tambe a aumenta. “Nos ta importa e productonan aki combina cu inflacion di otro pais, tin su efecto economico akinan na Aruba. A pesar di e realidad critico aki, nos a mantene nos vision y direccion di maneho consistentemente. Y nos ta mirando cu Aruba ta riba e caminda di recuperacion. Nos recuperacion awor ainda ta basa riba recuperacion nos turismo cual ta bayendo hopi bon,” segun Wever.
A cera luna di mei 2022 cu mas bishitante cu e luna di mei 2019, y nan ta gasta mas tambe den Aruba su economia. Minister Dangui Oduber su maneho ta pa percura cu e tendencia aki continua, y den e caso aki gobierno ta calcula cu lo finalisa e aña aki c’un recuperacion entre 90 y 95% di turismo, y otro aña, Aruba lo yega e nivelnan di prome cu pandemia. “Nos sa cu nos turismo so no por carga nos economia aunke con bunita e cifranan por ta mustra awo. Mi coleganan, e ministernan Geoffrey Wever y Glenbert Croes, p’esey ta buscando mas inversion y mas desaroyo economico. Diversificacion di nos economia ta crucial y aki nos sector di energia por hunga un papel importante. Tambe mi ministerio di infrastructura por hunga un papel importante den esaki.”
E prome minister a sigui bisa cu “tur esaki mester bay si den balansa cu conservacion di nos naturalesa y su medio ambiente. E tera cu nos ta bebe ariba, e no ta di nos. Nos tin e presta di nos futuro generacion, y p’esey nos mester conserva nos tera, flora y fauna, pa nan por tin un Aruba cu calidad di bida mañan. Pa esaki mi colega Minister Ursell Arends ta preparando e maneho y legislacion.” Meta di gobierno no ta solamente realisa un crecemento economico. Esey ta simplemente e vehiculo, pasobra e meta mester ta pa crea cupo di trabou duradero y asina crea progreso y bienestar real pa tur ciudadano di Aruba. E desaroyo cu gobierno ta busca, mester trece entrada pa asina gobierno por yega mas lihe na e punto di finansa saludabel y sostenibel.
“Y nos por, pasobra prome cu e pandemia nos a yega e punto aki caba. Pero kisas den e dianan aki nos por scucha critica sin mucho contenido, mas bien hopi ofensa of instigacion indirecto di oposicion cu ta trata na trece confusion y spanto den nos comunidad. Pero mi kier bisa nos digno pueblo, nos keto bay ta sigui mira e realidad cu hopi sentido di realismo, optimismo y compromiso pa logra nos meta den e momento turbulento cu nos ta bibando den”, el a bisa. Ta di lamenta cu e pandemia a stroba di logra e meta final, sinembargo, awo saliendo di e pandemia, a pesar di e crisis, geo politico, di energia economico, gobierno ta mas comprometi mas cu nunca pa sigui traha duro pa logra finansas publico sostenibel.
Pa mas lesa e edicion di TREMPAN mañan.
