Algun persona a topa cu un realidad duro awe marduga ora cu nan camber a kima. Nan a perde tur cos anto un siman prome cu Pasco, cu ta haci e reto pa recupera mas grandi ainda. Algun di e victimanan no tin ni famia na Aruba cu por saca un man yuda nan. Awor ta haci un apelacion riba nos comunidad pa yuda nan pa por haya un caminda di keda, recupera pertenencia, artefactonan, placa…na mod’i bisa; recupera nan bida bek!
Awe marduga alrededor di 1:45 am polis a presenta na Driemasterstraat #62, den Madiki, p’un cas na candela. Na yegada di polis a topa cu un apartamento bou candela. Mesora a pidi pa brandweer bin cu urgencia.
Ta trata di un cas cu a partie den diferente camber y ta huur nan cu diferente persona. E parti cu a kima, antes tabata un garashi, pero a convertie den un studio apartment. E forma con nan a pega loke tabata un simpel afdak, hacie un camber y peg’e na e cas mes a causa cu, via balki, cu e candela a cana pasa di pafo pa paden y asina pega un camber di e cas na candela.
Bomberonan a conta cu nan a topa cu un scenario cu hopi no ta realisa. Den e cambernan a topa cu tres pa cuater matras benta na suela. Parce cu den e cas no ta huur apartament, sino camber. Pero den cada camber ta huur cama, no un cama completo sino mas bien matras na suela, cu ta costa e huurdo 300 of 400 florin pa luna.
Testigonan a conta eyfo cu esaki no ta sosodiendo di awo, sino di basta luna caba. Mayoria di e huurdonan ta procedente for di Venezuela y tur dia ta fiesta tin eyden cu musica duro, gritamento, auto cu ta yega cu muziek duro y ta pita pafo, enfin, suficiente pa horta e paz cu tabatin semper den e bario.
Gloria Loaitia ta biba eynan hunto cu dos persona mas. Ta ora el a yega marduga, el a bin topa cu e candela sin cu por a haci nada. A logra haña contacto cu señora Gloria, el conta 24ora.com cu; el a perde tur cos. For di cama, frigidaire, stoof, paña, documento nan importante manera paspoort, cedula y hasta placa cash.
E ta pidi comunidad pa yud’e pa yega bek na su cosnan. Unico paña cu e tin, ta esun cu e tabata bisti cu ne. El a drumi na cas di un conoci di dje, pero awo tin cu mira con lo haci pa e proximo dianan y hasta lunanan nos dilanti.
Informacion ricibi ta cu; e cas no tin seguro contra candela. Bisando esey, e doño, un señora procedente di Colombia, lo mester drecha e cas riba su propio forsa y tur pertenencia cu a bay perdi den e cas tambe. Lamentablemente e huurdonan tambe a perde pertenencia y aparato, cu awor parce lo keda sin por haya nan bek pasobra ningun hende lo asumi responsabilidad pa e daño.
E candela a expande su mes hopi lihe, e edificio na banda tambe a ricibi daño pero no tanto manera e apartamento cu a kima.
Na sitio a nota ora cu e bomberonan a sali cu un boter di gas. No sa, kico ta e origen di e candela, investigacion lo saca afo kico exactamente a sosode. Locual si bombero a constata ta cu nan ta huur cada camber den e cas apart. Pues den cada camber a topa cu e butishinan chikito di gas, den cas, den camber, manera nad’un pasa. Ta conoci cu e boternan di gas mester ta pafo di cas y no paden. Esey mes a yuda cu e candela a expande asina lihe.
Ta haci un yamada no comunidad pa yuda e famia aki cu a perde tur nan pertenencianan debi na un candela cu tabata for di nan control. Por yama señora Gloria na 7439224, ban yuda!
