No ta di awo, pasobra dos aña pasa caba tabatin problema. Pero gobierno a keda cu nan mannan crusa y a laga e problema sin solucion. Es mas, como cu nunca a logra soluciona e retonan rond di e rioolwaterzuiveringsinstallatie (RWZI) na Bubali, na Parkietenbos y na San Nicolas, cu awo e problema a escala. Trucknan ta scoge pa benta awa di pos “unda cu ta” sin inporta e molester pa barionan habita.
Ironico ta cu e chauffeurnan di truck ta hustifica nan acto descabeya cu e doño di cunucu of tereno a duna nan permiso. Pero nan no ta tira e awa den nan mesun cura di cas, pero si riba tereno di otro hende, causando un peliger pa salud publico den barionan cu casnan caro, manera ta Safir, Esmeralda y Opal. Cu un habitante eytras kier cria bestia, no ta hustifica cu tur bisiña mester biba ch musca, sangura y holor desagradabel henter dia!
Di Polis pa City Inspector
Bisiñanan ta keha cu antes toch e Polis di Bario tabata yuda nan. Cu tempo a pasa nan pa City Inspector cu awendia ta conseha nan pa manda nan keho riba un app. Nan ta manda potret di truck y keha riba e molester, pero en bes cu Bureau City Inspector, cu ta resorta bou di Minister Ursell Arends, bay atende cu bisiña y e doño di rancho….nan a bay sinta bebe koffie cu e doño di e rancho y a kere su storia cu ta tres truck so ya basha awa sushi di pos of laundry eynan pa dia.
Meta di “Fixi”
No ta mucho tempo pasa Minister Ursell Arends hunto cu Bureau City Inspector (BCI), a anuncia cu nan a bin cu un aplicacion nobo yama Fixi, den cuadro cu introduccion di un maneho di desperdicio y ceramento di Dump di Parkietenbos, agregando cu esaki ta un necesidad desespera pa kick-start solucion. Tur esaki mientras ta busca manera pa mehora proceso of crea algun nobo na caminda, ta loke minister di naturalesa, Ursell Arends a yega di comenta, na momento di introduccion di e aplicacion aki.
Segun cu por a compronde, e aplicacion aki ta empodera e ciudadano cu mira algo bay robes, pa nan reporta esaki via e aplicacion aki, cu e por reporta di cualkier discrepancia n’e instancia concerni. Cu e app aki por observa un situacion, saca potret, skirbi un reportahe cortico di e situacion, manera e reportahe, pa despues Bureau City Inspector ricibi y despues redirigi n’e instancia concerni si ta necesario.
Si bo observa cualkier di lo siguiente, lo bo por raporta esaki cu Fixi:
• Dump ilegal of hende ta deshaci di sushi ilegalmente
• Ta deshaci awa preto riba tereno publico of den dam
• Hende ta deshaci di kimico riba tereno publico
• Ta sospecha individual of compania di deshaci di kimico peligroso (venenoso) riba tereno publico, of riba tereno priva sin tin permiso.
• Wacharaca di auto riba tereno publico
Ta bon pa por baha e aplicacion aki via appstore, p’asina si abo como ciudadano mira tipo di discrepancia asina, avisa autoridad di biaha pa por tuma rienda di e situacion.
App no ta soluciona nada
Pues tanto bal cu tin un app di Bureau City Inspector pasobra obvio e ambtenaar ta scucha un banda di medaya y cla. Esey no ta soluciona e problema. Ki mishi ta basha awa di pos den bario residencia? Un truck mes ta malo. Cua parti Minister Ursell Arends no ta compronde cu e habitantenan den e bario di Safir no por sinta pafo di nan cas, no por colga paña na cabuya, etc. Ta entre 10 pa 25 truck di awa sushi ta pasa den e bario aki henter dia pa basha awa.
No a adapta maneho di awa preto
Na momento cu e fenomeno aki a lanta cabes dos aña pasa, Gabinete Wever-Croes II (MEP-RAIZ) a priminti cu lo adapta e maneho y controla e asunto miho. Mescos cu no por controla y regula tiramento di sushi unda cu ta, awo e mesun problema a presenta cu awa preto, den cual trucknan di chupa pos, pa evita e gasto di combustibel pa bay te San Nicolas, ta prefera basha nan awa sushi con cu ta memey di e casnan luhoso na Safir.
DIP ta cobra si!
E bisiñanan ta cansa cu esaki ta sosode y ningun hende ta haci nada. Nan ta consciente cu nan erfpacht ta mas halto cu varios otro bario, pasobra DIP ta considera Safir, Esmeralda y Ruby como barionan “caro”. Ey tin casnan grandi y bunita construi cu hopi biaha hasta ta huur cu turista den forma di Air B&B. Pero asina mes Gobierno a duna permiso pa habri un rancho eytras, cu tur consecuencia cu e ta trece pa e bario.
Kico ley ta bisa di awa sushi
Segun tin entendi, no mag di basha awa zomaar riba ningun tereno. Awo, si doño di e tereno, sea cu e ta erfpacht of tereno propiedad, no lo haci mucho fastioso tanten cu e echo no molestia e bisiñanan cu holo of muskita. Pa loke ta awa sushi, sea awa di laba paña of awa di laba co’i kibra of awa di piscina, no mag di bash’e tampoco riba tereno publico (pafo di cura), cu excepcion di awa di yobida.
Loke si ta permiti, na momento cu tin awasero, si por ehempel cura di un persona yena cu awa, por habri un canal (crea un buraco) den e cura, p’asina e awa por sigui su rumbo y sali for di e cura.
Otro informacion mas cu nos a ricibi ta cu tur awa, si ta awa di cushina mes, no mag di tira riba tereno publico, pero e mester ta deposita den pos, esta den un sistema di drenahe cu ta bay pa un pos of den area habita, via di e sistema di riolering.
Doño di tereno no tin “hindervergunning”
Den e caso aki, propietario di e tereno a permiti e trucknan pa basha e contenido di su truck riba e tereno, pero sin tene cuenta cu e consecuencianan. Mester tene cuenta cu un tereno, segun ley, tin su proposito, sea comercial of residencial. Si uz’e pa cierto uzo cu por tin consecuencia, mester di un hindervergunning pa por haci esaki. Manera tabatin negoshi cu a bin cu proyecto cu sea nan ta haci uzo di gas, zonido duro, etc., nan sa publica den prensa cu lo bay tin cierto actividad y ta avisa e personanan den e bario di esaki. E personanan por bin cu un bezwaar contra di esaki tambe, cual nan tin cu anuncia n’e instancianan concerni.
