Algun miembro di Iglesia Odres Nuevos tabata presente n’e compleho di FCCA na Bushiri cu un evento pa esunnan cu ta biba eynan. Nan a pasa den e area check ken tin sushi pa tira afo y a haci esaki completamente gratis.
Julio Ramirez a splica cu nan ta busca manera pa sirbi y e idea ta con pa yuda guia e personanan cu ta den situacion dificil. Tin persona cu tin frishider of otro articulo den estado malo y ta hende grandi cu no por baha nan. P’esey e grupo aki ta pasa bishita nan pa yuda saca e cosnan aki y pone nan den un baki sushi.
E tipo di evento aki nan ta bay sigui haci den diferente comunidad, pasobra como iglesia e miho manera ta sirbi. Como cu nan ta stima Dios, e miho manera ta haci e boluntad di Dios. El a indica cu no solamente ta den area di Bushiri, pero tambe den area di Madiki, Tanki Leendert y mas otro caminda. Desde 3:00 pm nan a cuminsa yuda e comunidad di Bushiri cu e sushinan, pero ayera caba nan tabata eynan.
Reaccion ricibi tabata positive, mirando cu nan a informa esunnan di edad grandi cu nan no tin di carga nada. Loke nan mester a haci ta simplemente sali y avisa nan. Nan no kier haci esaki riba diasabra so, pero otro dia tambe. Como iglesia, como pueblo di Dios, nan kier haci un trabou cu tur institucion y iglesia por uni y bisa cu tur ta biba pa Cristo.
