Prins y Prinsesnan di St. Antonius College a topa despues di 45 aña

Recientemente un grupo di ex graduadonan di St. Antonius College di Sta Cruz a topa cu otro despues di 45 aña.
Elvira Maduro, ex studiante di e scol aki a splica, e grupo cu a bini hunto ta studiantenan di St. Antonius College di añanan 1973, 1974, 1975 y 1976, cu ta e aña cu nan a gradua. Nan tabata di e clan di Sheik Chibito Solognier.

E tema di e anochi aki tabata Prins y Princesnan y por a mira cu e participantenan a bisti manera personahenan di Casnan Real di e diferente paisnan Europeo y Arabico, pero pa e celebracion nan a presenta sin nan guardaespaldanan pa por a disfruta mescos cu tempo nan tabata bay scol.

E grupo cu a gradua e aña ey tabata en total 30 hoben pero solamente 18 di nan por tabata presente. Hopi di nan ta biba den exterior y pa motibo di trabou no por a yega Aruba pa participa den e gran celebracion aki cu a tuma luga na The Old Cunucu House cu a demostra di ta ekipa pa celebracion grandi y chikito.