E alegria no a dura mucho! Despues cu prijs di combustibel a baha luna pasa na e nivel mas abou den 11 aña, awo Gobierno ta cla pa anuncia cu atrobe lo bay aumenta prijsnan. Segun por a compronde for di fuentenan, gasolin ta subi cu 15 cen y diesel cu 2.6 cen. Lo anuncia e prijsnan nobo mañan y lo drenta na vigor diaranson awo.
Minister di Finansas, Asuntonan Economico y Cultura, mr. Xiomara Maduro ta anuncia e prijsnan nobo di benta di combustibel entrante e di dos siman di tur luna. Manera ta conoci, e prijs ta cambia tur luna, basa riba prijs internacional. Ultimamente e prijsnan ta bahando so! Y por a corda cu luna pasa el a baha na un nivel di mas abou pa e ultimo 11 añanan.
Luna pasa dia 13 di mei a anuncia cu e prijsnan a baha cu:
Gasolin unleaded-premium: 144,7 cen p/ltr. (-15,9 cen)
Diesel LS: 119,0 cen p/ltr. (-17,7 cen)
Kerosin: 96,7 cen p/ltr. (-18,3 cen)
Esaki ta nifica cu e prijs ta subi cu practicamente loke el a baha luna pasa.
E ultimo biaha cu prijs di gasolin tabata na e nivel cu el a baha luna pasa, tabata na januari 2009, ora cu el a yega 141.4 cen pa liter. Esey tabata un luna sporadico cu prijs a baha drasticamente y su siguiente luna a subi pisa atrobe. E tempo cu prijs tabata na e nivel aki ta na februari 2004 ora cu gasolin tabata costa 144.2 cen pa liter y a wanta asina algun luna prome y despues ainda. Pues, ta despues di 11 aña cu nos ta yega e prijs ey bek pero ta despues di 16 aña cu ta alcansa un “normal nobo” den prijs di gasolin. E pregunta cu tur hende kier sa: Ta pa cuanto tempo awo? Wel, e contesta ta haya awo: pa un luna. Ya cu diaranson awo e ta subi bek.
