Pa 7:30 di anochi di e di dos dia pa firma di sosten, PPA a bira e di tres partido pa alcansa e cantidad necesario. Lider di Partido Patriotico Arubiano, PPA, esta Lisette Malmberg tabata hunto cu candidatonan na sede di Censo Dependance riba L.G. Smith Boulevard ora cu e anuncio a keda confirma di parti di funcionarionan di Censo. PPA a haya 587 firma di votadonan Arubiano cu kier mira nan participa den eleccion dia 25 di juni.
“Hopi contento y hopi agradecido na e pueblo di Aruba,” tabata e prome palabranan di Malmberg e momento ey. “E cambio a yega,” el a bisa adicionalmente. Pa e politico nobato den un partido di hopi trayectorio, e hecho di a recauda e firmanan necesario ta nifica un speransa y e hamber cu tin den pueblo pa un cambio di rumbo pa nos nacion.
E lider di PPA a priminti cu nan ta trahando duro riba e programa di campaña y pa e fin di siman aki lo mira un presencia fuerte di nan riba caminda. Sinembargo, a indica cu ta bin cu cosnan innovativo y nunca antes bisto den politica na Aruba.
Pa mas detaye di esaki, lesa e edicion di mañan diaranson 12 di mei di bo corant digital Trempan. Bishita www.trempan.com y registra pa ricibi bo corant gratis!
