For di aña pasa caba a tuma nota cu a cuminsa tene sesionnan grandi di trafico den corte pa cobra personanan cu a haya un boet durante un control. Sinembargo mester bisa cu pa loke ta e prome dos lunanan di aña 2024, esaki a kibra record.
Ministerio Publico a yama un grupo grandi di persona cu a haya citacion pa presenta riba 29 di februari venidero dilanti hues di trafico. Pa paga prome cu e dia ey, por haci esaki online via cuenta bancario 4000905 di Arubabank bou mencion di e parketnummer. Por paga tambe na balie na Ministerio Publico despues di haci un cita via e website www.omaruba.com.
Si abo ta un persona cu mester presenta riba diahuebs 29 di februari, anto bo tin te diaranson 28 di februari di tempo pa paga. E citacion ta bin na caduca si bo persona paga na tempo.
Logicamente si en caso hende no ta de acuerdo cu e multa cu el a haya di Polis, e tin tur su derecho pa presenta dilanti hues. Hues ta tuma un decision nobo.
Tene cuenta cu Fiscal di Husticia lo exigi un suma mas halto riba 29 di februari y cu por pasa cu hues bay di acuerdo cu ne.
E prome sesion di trafico di aña 2024 a tuma luga dia 18 di januari ultimo. Te cu dia 22 di februari ultimo, tabatin cinco sesion di trafico en total pa loke ta aña 2024. Segun e diferente listanan cu Ministerio Publico a saca, por bisa cu rond di 1400 persona a yega corte pasobra no a haci pago di nan boet. Hasta esunnan cu a haci areglo y a paga algo,cu no a caba, a haya citacion pa bay corte.
Si fiscal duna un transaccion den su mayoria e ta 200 florin, pero si e persona no paga y e bay corte, e ta core e riesgo cu esaki lo bira un suma mas halto.
Den dos sesion grandi cu a tene a atende mas cu 1000 persona y cu e dos sesionnan chikito, el a yega na 1400 persona cu mester a presenta dilanti hues di trafico. Haciendo un calculo di loke nan a haya como oferta di transaccion of loke e suma cu tin den ley pa e infraccionnan cu nan a comete, por bisa e ora cu gobierno (ministerio publico) a haya den su caha un suma cu ta surpasa un kwart miyon (250 mil florin). Esaki ta sin conta e lista grandi cu tin poni pa diahuebs awo. Segun por a compronde, e lo por ta algun shen hende atrobe cu mester bay corte pa bringa nan boet cu e riesgo di haya un boet mas halto.
Riba e lista tin masha boet di 500 y 550 florin. Y e riesgo t’ey cu den corte e por bira mas.
Pero tambe tin hopi hende cu a dicidi di haci nan pago prome cu e caso yega corte cu ta haci cu kisas e por yega te cu 300 mil florin.
Cu tur pregunta por yama Ministerio Publico of mail na [email protected].
