E turista di Merca Yosif Abed, ta denuncia un mal trato cu el a ricibi na un tienda na Aruba, bayendo asina leu di clasifica esaki manera un crimen di odio, unda cu a discrimina y scupi riba su persona pa motibonan cu e ta considera di odio y racismo.
El a experiencia esaki pa medio di un persona cu no ta local, pero mas bien un persona aparentemente di nacionalidad Israeli, cu ta haci e situacion un poco mas complica.
Yosif ta un turista cu a bishita Aruba pa prome biaha, su prome impresion tabata cu nos Rubianonan ta hopi bon hende, a gusta su bishita riba e isla masha hopi. Yosif a keda den un Airbnb cu su casa y tres yiu. El a scoge Aruba pasobra el a scucha hopi bon comentario di Aruba for di su amigonan cu a yega di bishita e isla algun biaha caba.
PERSONA A SCUPI RIBA SU CARA
Locual a sosode, riba e ultimo dia di nan bishita net prome cu nan mester a bula ta lo siguiente. E famia a dicidi di bay busca desayuno prome cu bay aeropuerto. El a bay un restaurant den area hotelero, sinta pafo pa warda su mesa mientras cu su casa a bay wak algun shop di cosmetica den cercania, anto a drenta e Gold Harmony Cosmetics.
Na dado momento un waiter ta bin laga sa cu e mesa ta cla, anto el a bay dilanti di e tienda y bisa su casa pa e bin cu ne. Pero, el a bisa esaki den idioma Arabe. Despues tabata tin un dama cu a presenta tras di Yosif y puntr’e ta ki idioma e ta papiando, cual Yosif a contesta cu ta Arabe.
E dama despues a sigui na cuestiona Yosif puntrand’e di unda el a bin, y tambe puntr’e pa su paspoort. “El a bisa mi cu hende manera abo no ta existi, y ami ta pensando ta kico pasa e dama aki?,” segun Yosif. Akinan a inicia un discusion entre nan pasobra Yosif a confront’e bisando e dama cu e ta un persona teribel pa sinta papia di e forma ey cu ne. E dama despues a bay over na scupi riba su cara.
Ora a regresa e restaurant, Yosif a haya disculpa for di e waiter bisand’e cu e dama no ta permiti riba e propiedad mas pa motibo di problemanan cu aparentemente a yega di haya cu ne caba den pasado. Yosif a bay pafo y saca un potret di e dama aki, anto despues un otro dama cu tabata hunto cu ne a acerca Yosif. E cos mas pio cu Yosif a haya ta e echo cu nan ta admiti di loke nan a haci tambe.
A dicidi di trata cu e caso aki ora di yega bek Merca. E turista ta haya cu e tienda en cuestion mester kita e trahado for di trabao pa a haci algo asina. “Si tabata mi tienda, mi lo a kita e empleado for di trabao. E smile di e dama cu mi a papia cu ne despues, mi no por compronde con por hari y haci pret despues cu algo asina a pasa cu un turista. Ta manera nan a celebra loke nan a haci,” Yosif ta bisa.
TA PIDI GOBIERNO DI ARUBA TUMA ACCION
Yosif a manda un email tambe na nos prome minister di Aruba, a yama polis, pero e no ta hayando oido for di ningun hende. A yama oficina di prome minister anto ta parce cu nan djis kier a pone e cos un banda segun Yosif. “Mi a bin e pais aki y mi ta kere den companianan, y den gobiernonan e liderazgo ta cuminsa na e top, dus mester tuma accion.”
E hendenan cu a haci esaki ta mustra di ta haci e constantemente caba, y si no bringa esaki, segun Yosif, chens ta grandi cu lo bolbe ripiti si no tin hende cu ta contra aresta esaki. No ta aceptabel pa tin hende asina ta traha y ta trata hende di e forma odioso aki manera cu a haci cu su persona.
Yosif a bay den henter un discusion cu e persona kende aparentemente lo ta di nacionalidad Israeli y cos a cuminsa bay totalmente for di man verbalmente. E turista a sinti dado momento cu e persona a tuma un postura manera cu e kier a agredi su persona pero no a haci esaki pasobra nan ta na Aruba segun Yosif ta conta nos.
Yosif ta bisa cu si tabata na Palestina nan ta trata nan manera animal mes, pero ora ta topa cu nan den paisnan cu otro leynan manera nos, aki nan no por comete e tipo di actonan aki cu facilidad pasobra ley ta na su banda. “El a mustra manera e kier a dal mi, pero e leynan no ta permiti esaki aki. E tabata frustra cu e no por a haci mas pasobra nos tabata riba boso pais, pasobra e tabata sa cu e no por a haci nada mas horibel cu mi.”
Yosif ta pidi pa tuma accion pasobra esaki ta un appel putri cu mester deshaci di dje pa no sigui contamina Aruba su hospitalidad. Den un grabacion por mira un poco di loke a sosode y esaki ta bayendo den man di diferente hende, plataforma y instancia.
EMPRESA LOCAL
A trata di drenta den contacto cu un representante di CNV ENTERPRISES N.V. cu ta opera Gold Harmony Cosmetics. E representante ta di origen Israeli, Chaim Dayan. El a opta na prome instante pa evita e noticia sali den publicidad puntrando pa contacto di e persona y purba yega na un areglo. Tambe e la nenga cu su trahado a inicia e discusion y mas bien ta e pareha Mericano di origen Palestino lo a cuminsa busca problema door di bagatalisa e pacus su producto y personal.
Na momento di a haya e informacion aki, e reportero di 24ora.com a bay na e sitio. Durante grabacion a purba intimida nos reportero y camarografo door di persigui nan auto riba Avenida Nelson O. Oduber. A keda core tras di nan auto. Chaim a keda di mustra nos e videonan pero despues ora a yama y Whatsapp, Chaim no tabata mustra di tin mas interes di duna su banda di medaya publicamente.
Unico cos cu el a bisa ta cu e no ta desea e crisis di Israel cu Palestina yega te na Aruba.
Di su banda Yosif Abed tin un afspraak cu embahador di Reino Hulandes na Washinton riba e tema e siman aki.
