DOW a duna oportunidad pa compania cuminsa bid riba proyecto. Pero manera cu a pasa cu e asunto di kavel, unda no a laga e nombernan ta conoci, esaki a sosode cu e companianan cu ta bid.
Esunnan cu a bid p’e proyecto di “Bewaking DOW-stortplaats te Barcadera” ta preocupa p’e echo cu DOW no a informa ken a gana e bid. E unico informacion cu nan a ricibi cu DOW lo tuma contacto cu nan despues. Nan ta cuestiona e echo aki y ta puntra unda e transparencia ta keda.
Antes DOW tabata habri bid dilanti tur compania y asina aki tur tabata informa ken a gana, cua compania a bid mas barata. Cu tur compania cu a bid p’un proyecto ta haya informacion ken a gana. E situacion aki unda cu no ta yama e companianan cu a bid p’un proyecto ta algo di cuestiona. No por ta asina cu ta laga compania den duda.
Unda e transparencia a keda? Kico DOW tin di sconde? E companianan tin hopi pregunta. Ta cuestiona e echo cu Minister di Integridad, Ursell Arends, no ta pone presion riba Prome Minister mr. Evelyn Wever-Croes riba con DOW ta hiba su maneho riba bid.
