Dia 19 di november ultimo a tuma luga den e oranan di marduga, e eclipse lunar parcial mas largo den historia den e ultimo 580 aña y parti di e rand (umbra) di e eclipse a dura relativamente hopi, for di 3:09 am te cu 6:36 am.
Marcos Bislip Jr. hunto Aruba Astro Research International, a cubri e evento aki fo’i Sero Preto na San Nicolas.
E ta conta cu awa a yobe y a stroba un rato pa loke ta e observacion. Pero despues tur cos a sigui normal. Tabatin algun nubia cu a pasa pero no cu shelo a cera completo.
Na dado momento tabatin un shelo cla y hopi bunita, el a comenta den su comunicado di prensa.
Na Aruba a observa y mira mas di loke a keda calcula. Tabata por lo menos un ora y 35 minuut cu por a disfruta di e eclipse. Aruba no tabata den e pasada di e eclipse 100% pero por a mira mas di loke mester a mira y esey ta un logro grandi. Por ultimo tabatin nubia di awa cu a bin cubri e luna pero asina mes e luna a sali y a duna su ultimo briyonan. Por a mira e bahada di solo den e nubianan di colo geel masha bunita y tambe a logra capta e momentonan unico di luna bahando den e nubianan di awa na horizonte. E tabata un eclipse parcial di luna hopi bunita y tabata e eclipse parcial di luna cu casi tabata un eclipse total. Tres porciento so pa e ta total, unda cu e sombra di nos planeta tera a cubri 97% di e superficie di e luna.
E eclipse parcial mes a cuminsa pa 3:09 am na Aruba na luga di 3:18 am, esta mas trempan. Aruba Astro Research Int. a logra colecta varios dato importante di e eclipse mes na Aruba, a saca potret y a filma e evento mes na Aruba. Tambe a publica cuater link di exterior cu ta den e pasada di e eclipse mes transmiti riba e pagina di Facebook di arubaastroresearch.
Aruba por a disfruta di un bunita y historico Eclipse Parcial di Luna Saros 126 cu lo keda marca den historia di Aruba.
Por ultimo Marcos Bislip Jr. a comenta cu e hecho ki a cay riba fecha natal di su tata Marcos Bislip Sr., en feliz memoria, cual ta un regalo di Papa Dios. Bislip a comenta di dedica e evento celestial aki na su tata stima, cual hecho e ta considera como un evento grandi.
