Diabierna den careda di 10:30 pm polis a presenta pa un caso di maltrato na Pos Chikito. Na sitio e agentenan a haya informacion cu un pareha sali. Pero na momento cu nan a yega cas bek, e homber a bisa su pareha cu e ta bay sali bin bek.
Mesora, e pareha femenino a reacciona y a cuminsa bisa e homber di sa cu e ta bay topa cu su frei. E homber no a gusta kico el a bisa y di biaha a cuminsa altera. E muhe a pusha e homber, consecuentemente cel di e homber a cay y a kibra. E problema a escala, unda e homber a agredi su pareha y despues kier a bandona sitio. Aki e muhe a coy piedra y tir’e, pero a kibra glas di un Hyundai preto.
E agentenan cu a presenta na e sitio, a papia cu e pareha despues di a tende kico tur a pasa. E suegra, mama di e homber, a indica cu e no kier p’e muhe biba na su cas, aunke e ta contribui. El a pidi p’e muhe bandona e cas di biaha.
