Awe merdia pa 12:20 pm a sosode un accidente riba e caminda grandi di Savaneta. Aki un auto marca Hyundai, modelo i10, color di oro, numera A-55398 a bay dal den un ambulance di ImSan, numera TR-19. E impacto tabata asina fuerte cu e chauffeurnan di ambulance mes a resulta herida, pa cual a manda pidi nan coleganan pa bin asisti nan y brinda nan mes cu cuido.
Pero na yegada di polis a constata cu chauffeur di e Hyundai color di oro ta bou influencia di alcohol y mesora a deten’e na e sitio. Polis a bis’e su derechonan y a hinc’e den un transporte policial pa hib’e ward’i polis San Nicolas na unda un subfiscal tabata warda riba dje pa dicidi riba su encarcelacion of libertad condicional. Asina por mira cu durante pleno dia, tin chauffeurnan ta stuur burachi y causa daño innecesario na otronan.
Seguro di e chauffeur burachi awor lo mester paga e daño haci na e ambulance. Den caso cu chauffeurnan ta burachi, hopi biaha e companianan di seguro ta cobra e cliente sea ta un parti di e gasto of te hasta henter e gasto bek. Tambe tin algun caso, specialmente si sosode na mas di un ocasion, cu e compania di seguro ta nenga di sigura e chauffeur den futuro. Y asina ora otro seguro haya sa cu a saca bo di un seguro pa motibo cu bo ta stuur burachi y causa accidente, ta haci e chens pa por cambia seguro masha dificil.
