Jasmira Croes-Mora ta e coordinador pa POH. POH ta para pa e Praktijkondersteuners Huisartsenzorg. Esey ta nifica cu nan ta yuda e dokternan di cas pa atende cu pashentnan cu tin malesanan cronico.
Durante e conferencia di prensa semanal di Departamento di Salud Publico, Croes-Mora a splic cu e dos malesanan cu eigenlijk ta bezig cun’e actualmente ta e malesa di Diabetes y e malesanan cardiovascular.
Den esaki e proceso di e trabao ta asina. Ta yama e pashentnan activo. Esey ta nifica cu no ta warda e pashent mes bin dokter di cas.
Nan mes ta tuma contacto cu nan. Door di e sistema cu e dokter di cas ta traha cun’e, por mira cual ta e pashentnan cu ta diabetico y kendenan ta esnan cu tin problemanan cardiovascular.
Ta traha un cita cu nan. E prome cita ta dura un ora. Ta echt tuma tempo pa asina ey atende cu e pashent. Pa bo bay splica un pashent, pa bo bay coach un pashent, bo no por haci’e den 10 minuut.
E dokter di cas hopi biaha no tin e tempo pa por haci esey. Den e caso aki e Praktijkondersteuner si tin e tempo pa por guia y educa e pashent con e mester come, bayendo bek riba e cambio di estilo di bida, y e parti di movecion cual ta un pakete hunto.
E no ta bay solamente pa cambia e manera di come na uno mas saludabel, pero e ta tambe e parti di incorpora e ehercisio.
Segun Croes-Mora, tin e infrastructura rond. Tin un Linear Park hopi bunita y hopi amplio, unda cu por cana. E no ta costabo nada y bo mes ta dicidi ki ora bo por bay haci bo ehercicio.
Tambe locual cu ta pone enfasis riba dje, ta e parti tambe di famia. Si bo tin un pashent cu tin sucu of tin cualkier otro malesa cardiovascular, e pashent su so no lo por atende cu e malesa, si e no tin e sosten di su famia.
E famia no por bay cambia e manera di come pa un solo hende den e famia y e resto no ta bay come mesun cos.
Si bo haci’e, bo tin cu haci’e hunto. Esey tambe lo percura e ora ey, si bo tin yiunan den un famia, pa asina e yiunan tambe por adapta y adkiri un manera mas saludabel di come.
Na final, no ta e mucha ta esun cu ta bay haci compras, sino e mama y tata ta esun cu ta haci compras y percura pa ki tipo di cuminda tin den cas.
Tambe un otro parti hopi importante cu e POHnan ta haci, ta guia e pashentnan con pa bebe nan remedi.
E prome paso semper ta e cambio di estilo di bida. Ta purba di haci’e mas natural cu ta posibel y hopi biaha eigenlijk, esey ta e fuente di e problema.
Door cu e hendenan no ta comiendo saludabel, nan no ta moviendo manera cu mester move, e diabetico ta cuminsa manifesta na un edad hopi mas hoben cerca mayoria di e pashentnan.
Si cuminsa eynan, hopi biaha ta tackle e problema hopi mas efectivo. Hasta tin pashentnan unda cu a haya cu ta baha e remedinan, djis door di haci cambio di e estilo di bida so.
Eynan por mira cu esey ta un di e problemanan mas importante cu tin cu pak aan, si kier echt pa e pashentnan diabetico aki y cu problemanan cardiovascular por tin un miho calidad di bida.
E di dos paso ta splica nan con ta bebe e remedinan. Tin hopi hende cu no ta bebe remedi. Tin hopi hende no sa con pa bebe nan remedi. Bo tin cu echt splica nan.
Atrobe e procesonan ey no ta zomaar den un consulta ta bin ta splica nan y e pashent ta bay cas bek.
Ta keda papia cu e pashentnan. Ta keda wak nan. Ta mira un pashent por lo menos cuater biaha pa aña.
Segun Croes-Mora, e prome consulta por dura entre 45 minuut pa 1 ora, pero e proximo citanan por dura por lo menos mey ora.
Ta echt tuma tempo pa splica e pashentnan, cu ora haya resultado di sanger, kico nan ta wak. E ora nan tambe por hou bij nan mesun salud.
Locual cu kier logra eigenlijk awor aki ta un zelfzorg management, unda cu nan mes ta tuma control di nan salud.
Na final di dia e POHnan no ta bay cas cu nan pashentnan. Ta e pashentnan mes, ora cu yega cas, of ora cu yega den un supermercado, e ta esun cu tin cu haci su escogencia concientemente. Kico ta bay scoge. Si ta na un fiesta, kico ta bay scoge. Ta bay scoge algo salud, of algo insaludabel.
‘Ta purba di coachnan pa nan ta mas conciente di nan escogencianan.
Den un nutshell esey ta e parti di e trabao di e POH. Actualmente no ta tur dokter di cas tin POH. A cuminsa cu un di tres grupo dia 1 di November. Diadomingo cu tabata tin e walk and run di Diabetes, a probecha pa a saca nan prome foldernan y nan poster, como tambe nan tin nan banner di e POH. Esey ta pa echt haci e hendenan mas conciente cu tin un POH.
Haci uso di dje. Ora cu yama e pashent, bin na e consulta, e ora por yuda e pashent tuma control di e salud.
