Polis ta dispone di informashon verídiko ku aktualmente tin un kantidat di plaka di papel di shen florin falsu den sirkulashon riba merkado lokal.
No opstante ku e plakanan di papel aki ta falsifiká, e posibilidat ta grandi ku si no tuma nota di algun desviashon remarkabel riba nan, e biyetenan aki ta resultá den man di siudadanonan inosente, perhudikando nan i nos ekonomia lokal.
Resientemente Banko Sentral a duna informashon indikando kua ta tur e puntonan ku
mester paga tinu riba dje, na momentu ku bo ta risibí un plaka di papel di shen florin.
Kuerpo Polisial ke atvertí pa sigur den oranan di anochi kaminda tin ménos iluminashon, pa pone hopi mas atenshon na e plakanan di papel aki, ya ku den skuridat e karakterístikanan ta ménos visibel.
No ta konosí te ainda pa polis kuantu ta e kantidat di papelnan di shen florin falsu ku tin den sirkulashon, pero sí nos ke pidi komunidat pa tene kuenta ku nos ta aserkando fin di aña kaminda mas sèn ta wòrdu gastá ku normal.
Konsekuentemente malechornan por hasi mal uso di e oportunidat, pa hinka e papelnan falsu aki den sirkulashon.
Si bo tin duda ku bo dispone di un papel di shen florin ku por ta falsifiká, aserka un banko komersial pa esaki por keda verifiká pa bo.
Kuerpo Polisial ke enfatisá ku traha, falsifiká, distribuí òf tin na stòk plaka di papel òf moneda falsu, ta kastigabel. Tambe si bo a risibí esaki i sigui sòru pa e keda den sirkulashon.
Pues si bo ta dispone di plaka di papel falsu, NO sigui usa esaki pero entreg’é na un banko komersial òf na Intake di kualke warda.
