Un rato pasa Departamento di Salud Publico Aruba (DVG) a confirma cu tin un caso mas di Coronavirus na Aruba. Ayera mainta un piloto di Aruba Airlines cu a bula cu un avion for di Jacksonville pa Aruba, a test positivo! El a bira e di tres caso activo awo di e virus di Covid-19 riba nos isla y e di 104 caso total pa Aruba desde 13 di Maart 2020. Esaki apenas riba prome dia cu Gobierno a habri frontera internacional atrobe.
E piloto tabatin dos siman na Merca pa busca e avion di Aruba Airlines cu tabata eynan pa drecha. Ayera a sali di Merca pa Aruba cu e avion, sin pasahero abordo. E piloto no tabata mustra sintoma pero na Aeropuerto a haci un test cu ne toch y a resulta cu e tin e virus. A pone den isolacion mesora na su cas mes, pasobra e no ta sinti malo y no mester tratamento medico ainda.
Ayera Minister Presidente mr. Evelyn Wever-Croes a bisa cu crisisteam ta siguiendo e desaroyonan di cerca na Merca y lo evalua ora ta mas cerca, si lo habri frontera pa Merca dia 10 di juli of si lo want’e cera algun dia mas. E Epidemiologo di Corsou a conseha Aruba pa wanta un rato mas sino ta core hopi riesgo. E mesun conseho el a duna Sint Maarten cu tambe a duna oido na e specialista experto riba maneho di epidemia.
