Banconan tin intencion di stop e uzo di checks. Di parti di Asociacion di Banconan di Aruba, vice presidente Pierre Rafini, a splica cu pa mas cu un aña caba, banconan a sondea e posibilidad pa descontinua checks, mirando cu check ta un metodo hopi anticua ainda pa paga. Si mira tur e tecnologia cu tin awendia na disposicion di clientenan y behalve cu ta hopi manual, e ta trece hopi riesgo cun’e. Sea cu e ta wordo perdi, of horta. Tin hende ta falsifica checks. Y tambe tin biaha nan ta uza checks den forma di pago, sabiendo cu nan no tin e fondonan pa cubri e check. Mirando tur esey y tumando den consideracion cu tin otro tiponan di pago cu ta mas facil, mas sigur, mas lihe y mas barata, e decision tabata mas cu claro e ora cu tin cu move hopi lihe den descontinuacion di check.
Entrante ki fecha
Esaki lo drenta na vigor pa aki 6 luna pa clientenan cu ta uza checknan personal. Y pa esnan cu ta uza checknan comercial, ta pa aki un aña.
Reaccion
Segun Rafini, nan ta prepara. Tin otro alternativanan mas sigur pa ofrece e clientenan cu ta ainda uzando checkbook. Si wak Europa por ehempel, wak Hulanda, ya tin 15 pa 20 aña cu nan a descontinua checks. Nan no ta uza ni acepta checks como forma di pago. Ta prepara y ta bay tin campañanan di concientisacion tambe riba no solamente descontinuacion di checks, pero tambe alternativanan cu tin cu ta mas miho cu checks.
Checknan cu resta
Cada check ta costa placa. Segun Pierre Rafini, cada banco lo bay tin su mesun estrategia pa esey. Pesey ta haci un comunicacion hopi avansa. Si wak awor aki, for di awo pa aki 6 luna, ta duna hendenan tempo suficiente pa caba di uza tur nan checksnan y no reorder checks. Si bo ta un hende cu ta uza hopi check y kier reorder checks pa uzo personal, djis tene na cuenta cu entrante aki 6 luna, cual lo ta dia 30 di Maart, checksnan personal lo wordo descontinua. Si abo ta dicidi cu bo ta bay ordo un check dia 1 di Maart, tene cuenta cu bo tin 30 dia pa uza e checksnan ey. Esey ta loke ta haciendo awor aki, dunando tempo suficiente pa caba di haci uzo di nan checksnan cu nan tin den nan checkbook ainda.
Haci uzo di otro metodonan di pago
Haci uzo di bo debitcard como forma di pago, haci uzo di un credit card como forma di pago, haci uzo di bo online banking, mobile y tambe haci uzo di e ATM pa bo lanta placa of haci transferencianan na cierto companianan. Tin cierto banconan cu ta duna e oportunidad na companianan di utilidad y tambe por uza ATM pa deposita placa tambe. Tin un sweet di producto cu tur banco comercial na Aruba ta ofrece cu por reemplasa checks hopi facil.
