Un grupo di piscado na Centro di Pesca na Spaans Lagoen ta disgusta cu e situacion reinante na e pier di band’i Rancho Clemente. John Laurence papiando den nomber di su compañenan a splica cu e construccion cu e comerciante a haci, a causa disgusto pa motibo cu el a blokia entrada y salida di e botonan di pesca.
Loke nan por a compronde ta cu un comerciante Mericano a cumpra un tereno na baranca unda e tin negoshi di huur ekipo di kayak y a dicidi di construi un pier flotante. For di e pier aki e ta huur e kayaknan.
E problema ta cu el a blokea e salida y entrada di mayoria di e botonan di pesca cu ta mara na e parti nort di e pier di Centro di Pesca Spaanslagoen. “Esaki ta un situacion intolerabel. Mi no sa si e tin e permiso. Si esey ta e caso mes, e situacion ta uno intolerabel pa blokia entrada di un grupo di drenta cu nan boto, o sea ta stroba nan,” Laurence a conta.
For di prome cu december a cuminsa pone cada rato un otro pida, te ora cu el a yega e grandura aki cu e ta stroba e piscadonan.
El a splica cu e luga of espacio pa maniobra a bira chikito pa e boto sali of drenta. Pa e motibo aki a manda carta pa DIP y minister Ursell Arends, ya cu nan ta sinti cu e situacion a sali for di man. E pier ta flotante tambe y ta move den tur direccion. Nan ta kere cu lo yega un momento cu e botonan na e Centro lo keda isola pasobra no por ni sali mas.
E piscadonan ta urgi gobierno, DIP y minister pa cay den e asunto aki pa pone un paro na e acto ilegal cu ta stroba bida di e piscadonan, di cual algun tin 40 aña trahando for di e punto pa bin wordo stroba awo. Nan ta pidi pa autoridadnan concerni drecha e situacion.
